Biakinn telin Thantlang ah Voi 9nak Inn a Kaang saal

November 27 zaanlam ah Thangtlang khuasung ah inn a kaang saal ih atu ca kan ngan tiangah meikhu a suak rero lai tiah theih a si.

Thla 2 ṭha fang ah voi 8 a kaang zo ih, tuini hi voi 9nak a si. Inn kaang lai video tawi online ih a thlah mi ah Inn 1 hnak ih tam kaang`n a lang ih inn ziangzat a kaang ti cu fiangfai in theih a si hrih lo.

Hmunhla ihsin inn kaang lai hmutu khuami pakhat cun “Zaanlam 4 luan hrawngin a kaang. Hmun hla ihsin kan hmumi a si tikah inn ziang zat a kaang ti kan thei lo. Inn kaangnak hi Lungtial le Market veng hrawng si`n a lang” a ti.

Tuini inn kaang ah Thangtlang view point thlanglam, Seihpyozi veng ih ummi St. Nicolas Catholic biakinn a kaang tel tiah theih a si ih, tuhlan ih a rak kaang zomi thawn thla 2 ṭha fang ah ralhraang SAC ralkap pawl in Thantlang biakinn 4 an kaang terzo tiah theih a si.

Inn Kaang zat le Ni

Avoi 1nak September 9 ah inn 1
Avoi 2nak September 18 ah inn 19
Avoi 3nak October 29 ah inn 164
Avoi 4nak November 6 ah inn 8
Avoi 5nak November 9 ah inn 2
Avoi 6nak November 10 ah inn 7
Avoi 7nak November 11 ah inn 3
Avoi 8nak November 24 ah inn 49
ti`n inn 250 luan a kaang zo ih, voi 9nak November 27 ih inn kaang zat cu felfai in theih a si hrih lo.

Leave a Reply

Your email address will not be published. Required fields are marked *