Atufang Falam peng boruak cu khuami pawl hrang phan sak um zet

Tuhrawng cu Chinramkulh Falam peng ah nitin deuh thaw in SAC ralhraang cangvaihnak hmuh ding a um. Ke thawn vaksukso an um ih mawṭaw thawn tawivak an um bet hlei ah Helicopter khal hmuh ding a um phahphah. Cuihtlunah an vak sukso nakah kiangkap mipi thinphang ceuseh ti`n meithal an hmetpuak vivo.

Tubaite Kalay lam in Falam lam an kaiso phah khalah khuami pawl ih zuatmi ṭilva fir phah vivo in lamziin ah nuam an ceen phah. Cuvekin Falam peng ah hriamhrei ralthuam kengmi thawn duhtawkin an cangvai tikah khuami ṭhenkhat cu an thinphang zet.

Tuini June 28 khalah SAC ralhraang thazang 50 tluk hrawng cu Locom ah umhmun an khuar tiah theih a siih tualsungum mipakhat cun “Lamtluan in meithal an kap phah vivo tikah Locom le kiangkap khua ṭhenkhat cu thinphangin hramlak ah beunak an hawl”.

“Hramlak an beunak khalah an him tinak cu a si cuang lo. Asancu Thantlang le Hakha peng lam vekin ralhraang pawl an cangvai ding phan a um zet.”

“Kan dung baite Thantlang peng ih ralhraang an cangvaidan cu hramlak ih beunak hawltu pawl hrang ṭih a nung zet. Lamziinpi zawh loin hramlak an zawh ih an Lam thianfai nakah bomb/RPG an hmang.”

“Lamziin thiafaiphah vekin an cangvai nan atak ahcun mipi humtu ralkapbu pawl in in rak bawh thup pang pei maw timi an phang ruangah hmailam tin in RPG an kap phah vivo. Cuvekin Falam peng khalah an cangvai pang cun khuami ṭhenkhat le hramlak ah an beu tikah an hrang phan sak a um zet” a ti.

Tuhrawngah Falam peng telin Chinram hmun ṭhenkhat ih SAC ralhraang cangvainak san cu felfai in theih a si lo nan boruak thlirtu ṭhenkhat cun hmunram umdan an zoh si men thei tiah an sim.

June 28, Locom khua ih umhmunkhuar ralhraang pawl cu zinglam nazi 11 hrawngah an thleng tiah theih a si ih ziangtuah dingin umhmun an khuar, khawilam an pan bet tum tvk cu theih fiang a si lo.

Leave a Reply

Your email address will not be published. Required fields are marked *