Aizawl ah Chin mi kut sung in riit theih Siivai kai lala

DSB Aizawl (District Special Branch) le 2 Assam Rifles ṭangrual in Kulikawn ah Chin mi kut sung in Rs 21.4 million (₹2.14 crores) man riit theih siivai an kai tiah theih a si.

Thu don mi vekin District Special Branch (DSB) Aizawl team le 2 Assam Rifles in zirzoinak an tuah ih Chin mi kut sung in sappia bur 34 sung ah Heroin gram 428.04 an hmusuak a si.

Riit theih siivai cu Chin ramkulh, Tonzang peng, Darkhai Khawthar mi Pu Khupzatung, kum 42, kut sung ah an kai mi a si ih ṭuanvoneitu pawl in Kulikawn palikzung ah thubuai tuah sak in an khum cih tiah thuthang kan thei.

Kan rampi a buai hnu ah Chin mi raltlan tamzet cu Mizoram ah sahimnak hawlin an tlan ih, mikhual dinhmun in mi khua mi ram ah harsa cingih khawsa an tam lai ah Daan thawn kalhawmi hiveklam sumdawng an um phah ruangah Mizo mipi an beidong zet thlang.

Ramsung ih cangvaitu Chin mipi ralkap siseh, Khawtlang hruaitu/pawlkom pawl khalin riit theih siivai phur le zuar thu thawn pehparin ralrin pekawknak thusuah an tuah tam zo nan mualphothlak zetin zarh khat ah voi 1 tal, Daan bahbal ruangah kaihkhih tuar Kawlrammi an um a si.

Leave a Reply

Your email address will not be published. Required fields are marked *