Ṭio tipikap ih CNDF le SAC ralhraang doawknak thu theih cin

Tuizing, March 26 khawvang hlan deuh ah Myanmar-India ramri, Ṭio tipikap ih CNDF ralkap riahnak cu SAC ralhraang in rinlopin an siim ih kahawknak a suak.

Cuih thu thawn pehparin tualsungum mipakhat cun FOM hnen ah hitin a sim.

“Mizaan lam ih, online ih thlah darh mi CNDF Thantar an phun mi, Lilawnpar an zuk nak kiangah a si.”

“Lilawn kiangih CNDF ralkap an riaknak kiangkap in ralhraang pawl in an bawh cia. Zing zun thawh dingin ralkap pakhat a suak ih rinlopin ralhraang pawl in an kap cih. A ṭang leh a ban ah an ngah. Amah hi kan mitheih a si ih ralhraang kut ihsin cu a luat thei. Nan, a rualpi mi 3 hrawng cu ralhraang in an kai” tiah amahcun a sim ih “CNDF lam in meithal zuunkhat khal an puah man lo” a ti.

Miṭhen cun Dalan an um ruangah hivek dinhmun a thleng tiah an rel nan kan “Hram” pakhat cun hitin a rel.

“Mizaan leh tihni lam ah Rihkhawdar ralhraang umnak hmun ah helicopter a ṭum ih boruak a sosang thei tiah kan rak hmu cia. Cun, tukaar tir lam ah Lilawn par ih CNDF Thantar an phun mi zuk pawl cu mizaan ah online ah an ti darh. Cumi phelh dingin Rihkhawdar ihsin an ra mi a si thei ih timlamnak nei cia in an ra mi a si ti`n kan hmu.”

“Riahbuk an la ṭheh veten CNDF Thantar cu an mah ralkap thantar thawn an thleng” tiah a ti.

Online ih video tawi darh mi ah Lilawn kiang ih mi an kai lai a lang.

Kahawknak a suak lai Video dang pakhat khal online ah thlah darh a si ih miṭhen cun Khawmawi (Ṭio) thlanmual kiangkap ah an doaw mi a si tiah an rel.

Cun video pakhat a um bet mi cu Ṭio Lilawn kiangih umtu CNDF ralkap pawl ih mawṭaw cycle an urkaang sak timi pawl an si.

Tuizing, Ṭio doawknak ah tualsungum pawl in mithi le hriam tuar an um tiah an rel nan CNDF lam in atu ca kan ngan tiangah thuthannak zianghman an nei hrih lo a si.

Leave a Reply

Your email address will not be published. Required fields are marked *