Ralring : US um Chinmi le Kawl lakah bumawknak maksak a um
US ram um Chin le Kawlmi lakah bumawknak maksak a um ih thlanhripuut in kum teel paisa khawlmi bum tuar an tam thlang hlei ah thinbang celh lo ah Zu-in in zurisabah canglantu an um rero zo.
Bum tuar pawl lakah ramdangmi bum tuar siseh, ṭhenkhat cu mah le mah Chinmi/Kawlmi lak rori ah theiaw cingin mi an bum.
Online paisa puam ternak in maw, neihsiah a thupten zuar sak in maw, ramdang mi thawn kopaw in mah ram mi, mah phunhnampi rori bumtu khal an um.
Tu khalah US cozah leiram rori mah ta vekin rel in “Oil/Gas” khur laih nak ding hrang mithlemtu an um ruangah “Oil/Gas” le leiram umdan theiciangtu hmuntonnak tampi neizotu pawl in tuhlan ih mipi ralrin an pek nak pawl cu a thar in kan run tarlang ding.
Thu um dan simfiahtu Thalbert McGinness cun “Ziang zat acres hmunram a nei ti cu ka thei lo nan leiram a hlangmi cu kum 7-10 hrang a si ih cumi ihsin paisa a sawr tum”.
“A leinak man siseh, man khung zet ih a zuar sal nak le dawr awknak record pawl a leitu hnen a pe lo dan kan zoh tikah bumawknak phunkhat si in a lang” tiah a ti.
Amah hi US ram hmun pakhat ih “Oil Field Trash Association” sungtel a si ih a thu rel mi ṭhenkhat tanglam ah zoh ……
“Oil & Gas operation & management” ah kum 40 lenglo hmuhtonnak neizotu mipakhat khalin Oil/Gas laih nak ding hmunram a leimi cu industry pawl cangvaihnak an nei lo lai fang le a man ol bik caan ah a lei mi a si thu a rel ih “cozah thawn lungkimnak caankhiah an nei mi sung lawng a mah ta a si. Ka rualpi Burmese pawl hmun dang ah sumphumnak tuah sawn dingin thu ron ka lo pe” a ti.
Mipakhat khalin ….. “kha mi leiram pawl kha amah ta a si lo. Federal government nei mi a si. Cun, a lai tu ding lole oil/gas suah thei tu ding company a nei lo cun cuvek neitu hnen ah a pe lole a hlang ṭul ding. A hmin in cu kum 10 hrawng leiram a kutsung ah um ding ti cu a si nan oil/gas a suah thei lo cun a hlangmi leiram kha kum 5 hrawngah an ti tawp ding” tiah a ti.
Tlunlam tarlangmi pawl cu an mah relmi sirhsan in nganmi a si ih kan nih FOM in a hranten nemhngetnak kan nei thei hrih lo a si.
