PDF ralkap thawn Facebook ah rualpi nan si ti`n Chin nu an kai
Magway ramṭhen, Ngape myone ih um Chin nu Mai San San Aye (Asho Chin) kum 29, cu PDF ralkap thawn Facebook ah rualpi nan si ti`n ralhraang ralkap in an kai tiah theih a si.
Amah hi Ngape peng, Tunggyi khuate ih um a si ih February 27 ah hmatpungtin thleng dingin khuasung a feh lai ah ceek gate ah a phone an zoh sak ih an kai mi a si tiah khawmi pawl in an sim.
A sungkhat naivai hminthup mipakhat cun “A nau thawn hmatpungtin tuah dingin khuasung an feh lai ah an kai mi a si. Ngape ralkap ceek gate ah a phone an zoh sak ih PDF ralkap thawn Facebook ah rualpi nan si ti`n an kai. A nau tla an kai nan anih cu mizaan ah a luat zo” tiah tualsung media hnen ah a sim.
Mai San San Aye cu atu ca kan ngan tiang an thlah ti thu a um hrih lo ih, cuih thu thawn pehparin Ngape peng hrambun CDF-Asho ṭuanvonei mipakhat cun hitin a rel.
“Kei mah zuk an hmu ruangah a si. Kan ram a buai hlan ihsin FB ah rualpi kan si zo. Tubai ah ralkap thuam thawn ka zuk aw mi FB ah ka tarlang ih cumi an hmu ruangah an kai mi a si ti`n in sim. Miṭha te a si ih mipi ralkap thawn pehparnak neitu a si lo. Bawmnak tivek khal a pe dah lo” tiah a ti.
Mai San San Aye an kai hnu, February 28 le March 1 khalah Ngape myone ih um Salai Tin Ko Hlah le U Thunthun tiih koh mi mipahnih kaihkhih an si ih cu pawl thu thawn pehparin ralhraang ralkap in thuthannak zianghman an tuah lo.
