Paisa puk thei lo ruangah ATM bomb puahtu Mizo Tlangval an kai
Aizawl, Rapublic veng ATM bomb puahtu cu February 22 ah kaihkhih a si zo thu, Mizo palik in thu an phuang.
ATM cu February 18 zinglam nazi 2:50 hrawngah puakkuai thei gelatin thawn puah hnawh a si ih a phuahtu hi Ramhlun North ih um Emmanuel Lalbiakzauva, kum 24, a si ti`n Mizo palik cun February 23, press conference ah thu an phuang.
Palik thuphuan dan ah Emmanuel Lalbiakzauva hin tuhlan ah ATM dangdang thammi a nei zo ti a si ih, atu an kai lai fang khalah gelatin 5 le hmaikor a kol.
ATM bomb puah zaan ih a bun mi hmaikor khal cu a hlon zo nan an hawl hmu sal ih, tuṭum gelatin 5 thawn an kai cih mi hmaikor cu a thar a tuah sal mi a si tiah an sim.
February 18 zinglam ATM bomb a puah lai ah kiangkap naivai ih um zohman an um lo ruangah khawngaw an um lo ih, a bomb puah mi khal cun phar le sangka tivek cu a siatsuah nan paisa retnak ATM a ti siat tham lo.
Palik in February 22 ah kaingah lo bang sehla cuih zaan ah ATM dang bomb a puah bet ding an zum deuh ih amahcun “SBI bank in Loan in pek duh lo ruangah ATM bomb ka puah mi a si” tiah palik hnen ah a rel.
Atu ah amahcu palik kutsung ah a um ih a thilsual tuahmi zirin Daan le Dun thawn hmalaknak an nei vivo tum tiah thuthang kan thei.
