Nupi hlun kap that tu Pa Bawi Ro Piang thu theih cin : UPDATE
Mizoram, Champhai ah mai nupi hlun rori kap that tahratin Kawlram lam ah tlanhlotu Pa Bawi Ro Piang cu tu ni tiang a um nak hmun theih a si lo ih Mizoram palik in kaih theih dan ding tawlrel in hmalaknak an nei rero lai tiah theih a si.
February 15, zaanlam nazi 6:45 ah Champhai, Kanan veng ih um a nupi hlun Nu Siang Ngun Par, kum 46, cu meithal thawn a kap that ih amahcu a tlan cih hi a si.
Cuhnu ah mi mawṭaw fir in Zokhawthar lam a pan ti a si ih, Mawṭaw cu Zokhawthar kiang ah a tanta ih amahcu atu ca kan ngan tiangah a umnak hmun theih a si lo.
Ramri ih um Chinmi pakhat cun “a umnak cekci cu theih a si lo nan Rih khuasung a lut lai hmutu an um. Mizo palik in ramri ih um Kawlram khuate ṭhenkhat ah theihternak an tuah ih a hmutui` pehtlaihnak ding phone number tivek tiang an pe zo. Cun, dothlengnak tuahtu mipi ralkap ṭhenkhat khal kai bawm dingin bawmnak an dil ih a zuk pawl thawn an kuat thluh zo” tiah a ti.
Falam peng, Webula kiang, Zalang khawmi Pa Bawi Ro Piang hin ziangruangah a nupi hlun a kap that ti cu thufelfai a um lo nan khawmi pawl cun fin aw sal beisei in an inn ah a va buai hnawh ṭheu ih tuhlan khalah voikhat a rak kap tum dah zo tiah an sim.
Mizoram hram bun media ṭhenkhat tarlang dan ah Pa Bawi Ro Piang cu riittheih number 4 thubuai thawn Thawngtlak dah si in veng sung khalin dawi tuar dah mi a si.
Pasal hlun kah tuar Nu Siang Ngun Par cu Champhai Kanan ah inn luah in kum 90 hrawng mi a nu le a fapa nautabik hawirianlo thawn khawsa an si ih sumdawnnak tuah phah le a remrem ṭuan phah ih pumcawmaw an si tiah thuthang kan thei.
