Falam peng doawknak thu kan theih cin – March 15
Chinram pantu ralhraang ralkap rual cu nazi kaar lawng feh ṭul mi Falam-Kalay karlak ah zarhkhat zikte an rei zo nan March 15 zinglam tiangah Falam khua hman an thleng thei hrih lo.
A san cu mipi ralkap ṭangrual pawl in lamziintluan ah ralthuam phunphun thawn an cil an nuai ruangah a si ih mithi an um hnih-thum zo.
Tedim peng ah PDF Zoland, CDM Siyin, MEDF le mipi ralkap ṭangrual pawl in nasa takin bomb an rak puah hnawh ih Chin mipi ralkap ṭhenkhat tla cu tumtahmi hlawh tling in an ralthuam a cem ruangah an kir sal zo.
March 9 ah ralhraang ralkap tampi cu raldo mawṭaw thawn Kalay ihsin Chinram an kai thok ih, March 11 tiangah mipi ralkap bomb puah hnawh an tuar ruangah mithi amalbik 6 um in hriam tuar 20 lenglo an um tiah theih a si.
Ralhraang ralkap rual cu an tum ram pan in March 13 ah Falam peng an lut thok ih CNDF ralkap in Mualkak le Zawnglei karlak ah bomb 8 an puah hnawh tiah an sim.
March 14 khalah Falam peng Valung le HtinShuu Sakhan karlak ah CNDF bomb kam mi fuh zetin an ti puak ih mawṭaw Ke 12 nei pakhat le Skart mawṭaw pakhat a sopsiat tiah CNDF thawn naivaitu hnen ihsin thuthang theih a si ih, Kan Hram pakhat cun “March 14 Falam peng kahdonak ah ralhraang ralkap 13 an thi” tiah a sim.
Hih thuthang kan ngan tiangah ralhraang dotu mipi ralkap lam ah khawngaw le hriam tuar an um thu theih ding a um hrih lo ih, ralhraang ralkap lam cu Falam peng ah an talbuai laifang a si.
Curuangah Kalay-Falam lamziinpi cu zohman zawh hrih lo dingin Chin ralkap in mipi an sim thei a si.
