Chinram pan in Ralhraang tampi kai so

Kalay ah mawṭaw thilri bungrua pawl thawn pungkhawmawtu Ralhraang SAC ralkap rual cu tuzing March 9 zinglam nazi 7 hrawngah Chinram lam pan in an kaiso tiah theih a si.

Mipi mawṭaw hramhram in laksakmi telin raldonak tank mawṭaw fate, thil phur mawṭaw tipawl thawn an si ih, mawṭaw to ralkap hi mipum 30 hrawng si in, dunglam ihsin Ke thawn thluntu ralkap dang khal an um tiah an sim.

Tubai March thla thok ah ralkap hrang ei-in bungrua phurtu helicopter cu Chin ralkap pawl in drone vanzam thawn bomb an puahhnawh ih Helicopter cu a khu suak phah in a zam ciamco.

Cuhleiah thilri an ṭhum zo mi pawl cu bomb puah hnawh an tuar bet ih, cumi pawl aiawh ah atu Chinram kaisotu ralhraang ralkap in leithluai ihsin thil an phur mi siding zum a si.

Kan dung March 7 khalah ralhraang ralkap 50 hrawng Chinram lam pan in an kaiso zo ih, tu ni tiang an kir sal hrih lo.

Curuangah Kalay-Chinram ziin zawh hrih lo dingin Chin ralkap in mipi theihternak an nei a si.