A pehpeh in Mindat khuate pawl ah Bomb thlak nak san relfiang

Atufang, Chin ram, Mindat peng ah doawknak um hran lo in bomb thlak nakin siseh, phukpi thawn ralhraang ralkap in nasaten an kap hnawh ih mipi an vavai zet.

Raltlan umnak khua pawl ah vanzam thawn bomb an thlak ih hmunhla ihsin hriamtum thawn an kap hlei ah khuasung khualeng le hramlak pawl ah vanzam thawn thlingthlanak an tuah bet ih khuatlang mipi helh an kam zet.

Ralhraang ralkap in cutiih doawknak um hran loin kahawknak nasaten an tuah mi cu tumtah an nei ding zum a si ih, Mindat CDF hruaitu pakhat cun raltlan mipi pawl khuapi sungah kirter sal an duh ruangah a si thei tiah a rel.

“Ralhraang ralkap in renawknak umloin atufang nasaten a kap nak hmun cu saklam Mindat, CDF hmun ram pawl a si ih khuapi ihsin raltlan beutu khal an um.”

“Kan hmuh dan ah cu mipi pawl umnak nei lo in khuasung ah kir sal hai seh ti an duh deuh in kan hmu. Khuasung ah nan um le nan him ding ti phun deuh in kahdonak an tuah a si thei.”

“Mipi khuasung kir in mitampi um lai ah hrilawknak an tuah duh. Mipi kha an duh lo cingin vote an thlakter dingih diklo zetin nehnak an co thu an phuang ding. Mipi tampi umnak hmun ah nehnak an co cun lenglam ihsin in hmuh dan a dang thei tiah an ruat. A ol zangin kan rel ding cun “hrilawknak hrang zin an sial” a si” tiah amahcun a ti.

Ralhraang ralkap in rampi ukhruai thuneihnak a la hnu, tu kum 2023 ah hrilawknak an tuah tum ih, mipum siarnak le hmalaknak hranhran an nei rero zo.

NUG siseh mipi ralkap dodalnak um cingin ralhraang ralkap cun rampi hrilawknak atak ih cangsuak thei dingin zinkong phunphun hawlin hmalaknak an nei rero.

Atu khalah Van par le hmun hla ihsin Mindat peng sung kahdonak an tuah rero hlei ah Ke feh ralhraang ralkap pawl in atharin hmanor an tum thu a suak ruangah Mindat ramsung boruak a sosang thei ti`n mipi ralkap in theihternak thu an suah a si.

Leave a Reply

Your email address will not be published.