NUG theihpitmi hriamkaibu pakhat in kyat ting 400 luan leiba nei zo
NUG theihpitmi B.21 Kani – PDF cun ralthuam lei nakah kyat ting 400 luan leiba kan nei zo ti`n February 21 ah mipi theihternak an nei.
Mipum 200 lenglo umnak B.21 Kani PDF cun NUG ralkap si cing in an hnen ihsin meithal bawmnak an dong hrih lo thu le M4 A1 meithal lei nak ah kyat ting 400 lenglo leiba an nei thu thuthang an suah ih ei-in hrang cu khuami pawl in in bawm tiah thusuahmi ah an tarlang tel.
B. 21 Kani PDF ṭuanvonei mipakhat cun “kan rel duh mi cu kan nih in nunnak kan thap ding ih nan nih in meithal ralthuam hrang in tawlrel sak ding. Kan nih in Min Aung Hlaing hnen ihsin mipi thuneihnak kan la kir dingih ASSK khal runsuak dingin mipi thu kan tiam”.
“Kan nih B. 21 Kani PDF hi raldonak lam ah kan cangvai zet nan kiangkap naivai khua pawl an tuar pang ding phangin doawknak thu kan suah tuk lo. Cun, tlunlam ihsin siannak kan ngah lawngah doawk thu mipi kan theihter” tiah a ti.
Tuhlan bangin pangaiten cangvai thei dingin le mipi hrang hmainortu si thei dingin mipi bawmnak an ṭul thu cu thusuahmi ah tarlang telcih a si ih ziangtizawng tal in bawmnak kan ṭul ringring tiah mipi hnenah theihternak an nei a si.
