Mawṭaw cycle fir tu a kai thei tu kyat ting 10 pe ding

Kachin ramkulh, Myitkyina khuasung catholic biakinn area sungta mawṭawcycle a hlo tamtuk ruangah fifir kai ngah tu kyat ting 10 kan pe ding ti`n thu an than.

Kan dung February thlasung lawngah mawṭaw cycle 10 lenglo an fir zo ti a si ih, CCTV in a zuk ngahmi mipakhat zuk pholang in a kai ngahtu kyat ting 10 an pe tum mi a si.

Mawṭaw cycle firtu hi mi bur an si ding zum a si ih CCTV in a zuk ngahmi mipakhat kaih ngah a si cun midang khal kan kai thei ding ti`n biakinn ṭuanvoneitu pawl in an rel.

“Biakinn area sungah zung a um cih ih, zungkai le biakinn thlacam tum vekin an lut ih mawṭaw cycle an fir. A caan le sun vang lai rori ah an fir. Tawh kan kalh thluh nan thir thawn an boh. A hlo a um phahphah ruangah Tawh dang khih bet a si ṭheu nan an fir thotho. Zung kai pawl ta khal a hlo ih biakinn area sungih um pawl ta khal a hlo thotho.”

“Zo an si ti kan thei lo nan CCTV in a zuk ngahmi mipakhat kan kai thei cun midang khal kan kai thei ding ti`n kan ruat. Curuangah a kai ngahtu cu kyat ting 10 pek dingin kan lung kim” tiah ṭuanvonei mipakhat cun a rel.

Kan rampi a buai hnu ah rukru le mibum hmang an pung nasa ih, miṭhenkhat cu misual kut tuar in thihhlohnak tiang an tong phah a si.