Khawmi 17 thattu ralhraang in midang 3 that bet
Sagaing ramṭhen, Myinmu peng, Tartaing khawmi minung 17 thattu ralhraang ralkap rual cu khua dang fang vivo in an vaktawi ih Letkapin khua ah minung 3 an that bet tiah theih a si.
Mipum thazaang 100 hrawng a si mi ralhraang ralkap pawl cun March 5 ah Letkapin khua an luhcilh ih khawmi 100 lenglo an kai hnu ah mi 3 an that tiah tualsung thu zirzoi dingih ṭuanvo pekmi mipi ralkap pakhat in a rel.
“Khua thlanglam ihsin an lut thok ih khua an kulh thluh. Cuih hmun ihsin a luat saltu mipi in phungkitlawng ih ralkiantu khua dangmi mi 3 an that tiah in sim” a ti.
Ralhraang ralkap in hmakhatten khua an luhcilh ruangah a tlanman an malte. Mi tampi an kai ih kum upa lam, nunau le nauhak ṭhenkhat an thlah sal nan tlangval le pacangno 50 hrawng cu an thlah hrih lo ti`n amahcun a rel bet hrih.
Ralhraang ralkap cun mi pathum an thahnak hmun telin phungkitlawng 2 an urkaang ti a si ih, kaihkhihmi khawmi pawl cu phungki tlawng dang ah an khumkhawm tiah an sim.
Tu dinhmun ah ralhraang ṭhenkhat in khua an suahsan hrih lo ruangah khuasung dinhmun felfai in theih a si lo ih, an kaih mi sungin thah tuar khawmi an um bet thei a si.
