Ziang ruang ah Taliban ralhraang pawl in Olsamten Afghan khuapi an la thei!

2021 July thla ah reporter pakhat in U.S. President Joe Biden hnen ah thusutnak a nei. “Taliban ralhraang pawl in Afghan rampi an la thei pei maw” tiah a sut. Joe Biden cun $83 billion cemliam in Afghan ralkap an ser suak mi le ralthuam an leih mi pawl khih hmuh in “olaitei` cangtheimi a si lo” a ti. (US hin Afghan thawn pehpar ih a hmanmi sumsaw cemliam zatekom hi $2.26 trillion hrawng a si. Cumicu amazon neitu Jeff Bezos, Elon Musk, Bill Gates le leitlun milianbik billionaires 30 neisiah kom thawn a zat aw. Nikhat ah million 300 an hmang.)

US cozah in sumsaw tamzet cem in Afghan ralkap ting 3 luan raldo kan zirh ih ralthuam phunphun kan leih an ti cingin Taliban pawl cun doawknak zianghman um hruthra loin August 15 ah Afghan khuapi Kabul cu olsamten an la thei.

Cutikah US cozah bawmnak hmuahhmuah cu a lak maw a si men ding? Ziangruangah kum 20 sung rori raldo kan zirh an timi Afghan ralkap pawl in Taliban ralhraang pawl an do let lo tiah thusutding a um?

US le Taliban an bia aw

Ralhraang pawl in 9/11 ih World Trade center innpi an siat sak ṭum, 2001 ihsin US ralkap pawl cu ralhraang do dingin Afghanistan ah an lut thok.

Kum 20 sung Afghan ram ah an khuasa hnu ah U.S. president Joe Biden cun September 11 ni netabik ah ret in US ralkap pawl Afghan ihsin lak suak thluh dingin thu a suah.

US ralkap lawng siloin an mah bawm tu ralkap dang le hnaṭuanpi mipum 8000 luan le contract thawn hlangmi mipum 18000 luan khalin Afghan cu an suah san.

Pu Trump lal lai, 2020 February ah Taliban thawn remdaihnak tuah in US ralkap pawl Afghan suahsan dingih lungkim hminkhennak an nei ṭum ihsin ramsung um thutheitu pawl cun thi dingin in tan san a si hi tiah an rak ti cia.

Taliban ralhraang pawl cun US ralkap in an ram an suahsan ṭan tir in a haahaa ten hmunram an la vivo.

Taliban cahnak tawhfung

Taliban pawl in hitiih olsamten ram an la vivo theinak cu dinglai cozah tlasamnak, eiruuknak le mah le mah rinaw ngamlonak pawl ruangah a si tiah mithiam ṭhenkhat cun an sim. Miṭhen cun local security thlahthlam in cozah ralkap lawng training petu US cozah khal an mawh puh. Cun, US ralkap umpitnak ringin an khuasa ruangah an tlung san tikah mahten kaihruaiawk an thiam lo titu khal an um.

Political scientists Jonathan Rogg cun “Pakhat lawng puhmawh a theih lo. ‘Intelligence failure’ ruangah khal a si. Taliban in a netnak cangvaihnak an nei hlan May thla hrawng ah khan US cozah cun local government le ralkap pawl in amalbik thla 6 ihsin kum 1 hrawng cu ram an hmunkham thei ding tiah an phuang. Cumicu US cozah zumnak a si ih an naivai ih hnaṭuan ramsung cozah lam khalin cutin ruahnak an nei ding. Cumicu ‘Intelligence failure’ a si.”

“Cun, pakhat cu US ralkap pawl ih training pemi mipum 300,000 luan le Taliban pawl neih mi hnak ih ṭha sawn dollar biliion man ralthuam kan nei an ti mi cu Ka le Cahnah par lawng ah a si. Atakcun hruaitu ṭhalo, kaihruaiawkdan thiamlo le eiruuknak in an ram a ciah neh ih an ralkap pawl khalin cozah an rinsan thei nawn lo. Ralṭhatnak khal an nei nawn lo ih kan sung thotho ding tiah ruah nak an nei” a ti.

July 30 ih US Special Inspector General for Afghanistan Reconstruction (SIGAR) thusuah vek a si le Kabul cozah ralkap telin Afghan National Security and Defence Forces (ANDSF) ah ralkap 300,000 hrawng an um ti a si nan sunglamthu theitu le zirzoinak neitu pawl cun Ka le Cahnah lawngah mipum an tam men tiah an sim.

Jonathan Rogg cun “ka theih sual lo a si le ralkap zaṭek 60 cu ‘ghost soldiers’ an si tiah Afghan ram thu zirzoinak neitu University pakhat in ca an suah dah” a ti.

Thlarau ralkap ‘Ghost soldiers’ timi cu a um ngaingai lomi phuahcawp ralkap tinak a si. Cupawlcu ralkap ngaingai vekin hmin an khum thluh ih an thla hawlh pawl cu an pu le pawl in an ei ruuk thluh.

Cuvek cu an mah ralkap lala khalin an thei thluh tikah thadongnak le rinsanawk lonak ah an hmang.

Taliban in ram an lak lai ah thlahlawh donglo ralkap/palik tivek khal an rak um ih cupawlcu an mah Taliban riangri in bawmnak an pe ih an tlun ter tiah ramsung medai ṭhenkhat cun an ngan.

Cuvek a si tikah hmasalam ram an laknak ih cozah ṭuanvonei pawl in doleetnak zianghman an nei lo tikah rampumhuap ralkap le palik tamsawn cun an dung an thlun ve mei. Kan neh thei cuanglo dingih bawmtu khal kan nei cuang lo ding timi ruah nak an nei.

Cuvek thu phunphun ruangah Taliban ralhraang pawl cun Afghan khuapi Kabul telin ramsung hmun tamzet cu olsamten an la thei a si.

Leave a Reply

Your email address will not be published. Required fields are marked *