Zawng 6000 hrawng in Lopburi khau Buaihnawh

Thailand, Lopburi khua ih zawng pawl cu rawl cuhaw in lamziin pi ah an buai ṭheu ih khawsung mipi ṭhenkhat cu leng suak ngam loin, innsung ah an kherhkhumaw.

13th-century lai hrawng ih dinmi khua hlun zet a siih, kum tin, tourists vehvaitu thawngteel an um ih cuih tourists pawl cun zawng pawl ih ei-in ding banhla, thingthei an pek ṭheu.

Asinan Covid – 19 ruangah an khua vehvaitu tourists an um nawnlo ih zawng pawl khal rawl pektu an nei nawnlo ruangah rawl cuhaw in a rualrual in an sualaw ṭheu.

Khawsung um mi pakhat cun “kan mah minung sawn riangri khumaw a ṭul ih zawng pawl sawn kha zalen zetin an um. An eibang thil ṭuktak le an ek pawl cu duhduh ah an hlon, an thawh ih a rim a sia ngaingai. Abikin ruahsur caan ah a rim celhawkṭha si lo” tiin AFP hnen ah a sim.

Zawng rual pawl cu khawsung um mipi in ti thei tawkten rawl an pek phahphah ṭheu ih an rawl pek mi thilthlum, cereal, theiti pawl cun zawng pawl a ti cak ih sex lam tiang in an cak sinsin ruangah nau tamzet an hring ih an karh sinsin. Kum 3 sungah a let rorin an karh ih tuah 6000 an kim zo.

“Hman nawnlo mi Cinema hall pakhat, headquater ah an hmang. An kiangkap ah zawng thicia ruak khal a tam zet an kiang nai ih va feh pohpoh cu an rak sual mei” tiin khawsung mi cun a sim.

Khawsung mipi harsatnak cu cozah lam in theitawk suah in an bawm. Zawng pawl cu itthatsii thawn an kap ih karhzai theilo, nau hring theilo dingin nau-inn an phitsak hnu ah an taksa par ah hminsinnak tattoo an cuk ih an thlahsal.

Tu khalah Thailand wildlife department in zawng nu pawl ih nau-inn phitsaknak an nei rero ih tuzarh sungah 500 tal phitthei an tum a si.

ref:Guardian,ATS

Leave a Reply

Your email address will not be published. Required fields are marked *