Zahmawh rimnam Khua hmin vehvaitu nei tam tuk cu A hmin an thleng phah thluh

Austria ram ih khua fate, zahmawh rimnam khua hmin “F–king” cu tourist le media lam ih ngaihsakluan a hlawh tuk ruangah a hmin thleng dingin khuami pawl an lungkim.

German ramri ih um, mipum 100 hrawng umnak “F–king” khua cu hmaikum ihsi thok, “Fugging” tiah ko thok dingin cozah lam in an nam hnget zo.

Khuabawi Andrea Holzner in “rel khal ka reltam peih lo. Khua hmin tarnak Thirphek khal an fir ringring. Cun, Khua hmin ruangah tourist le media ih ngaihvenluan kan hlawh ruangah kan thleng tumbik si ko. January 1, 2021 ihsi thok, “Fugging” ti`n kan ko thlang ding” a ti.

An khua hmin a dangdaituk ruangah social media ah post duh in an khua va pan tu an tam zet ih khua hmin tarnak kiangah zahmawh lang zik ih zukaw hrimtu khal an um ṭheu ti a si.

Andrea Holzner cun “mi huatsuak pawl in kan khua hmin tarnak signboard in fir sak ringring. Fir thei nawnlo ding in concrete thawn kan rak tuah tum lawk nan a remcang sal lo. Ahmin kan thleng hnu cun hnaihnoktu an dem deuh kan beisei” a ti.

“F–king” cu 6th century hrawng ih khua tohtu Focko timi hmin lak ih sak mi siding an zum ih kum 1825 hrawng ahcun Fuking ti`n an ko. Mirang ṭong ih zahmawh rimnam ṭongfang suak dingih C an belh cu ziang tik ah a si ih zo in a bet tikhal theihcian a si lo.

Austrian census ih tarlangmi vek a si le tufang ah “F–king” khua ah mipum 106 an um ih Innkhi 32 a um a si.

Leave a Reply

Your email address will not be published. Required fields are marked *