Youtube ih a thil zir mi cu a thih nak ah a cang riangri

Youtube video toturial zoh phah in helicopter tuahtu India mino pakhat cu cangsual in a nunnak a liam.

Maharashtra, Fulsawangi khuami, Sheikh Ismail Sheikh Ibrahim (kum 24) cu Tlawngkai clohsan in a uu hnen ih hnaṭuan a si ih tumtahnak tumzet neitu a si.

Suahsemnak khua hmin ṭhatter ding hi a tumtah bikmi a si tiah a rual le pawl cun an sim. Beiseinak tumzet thawn “Munna Helicopter” tiih hmin a pe mi, kut thawn tuah cawp Helicopter cu kum 2 sung a buaipi.

A rualṭha Sachin cun “3 Idiots film ih cangtupa Rancho (Aamir Khan) kha a ngai sang zetih amah vekin zo hman ih ruah ban lomi thil ropi ka tuah ding a ti ṭheu.”

“Youtube ah zir phah in Helicopter tuah nak ding hrang thil ṭul pawl cu kum 2 sung a hawl khawm. Maruti 800 mawṭaw engine le thir a ser bet mi pawl thawn Helicopter a tuah suak mi a si” a ti.

Helicopter cu India Independence nipi ah ropi zetin an khua pawl hmai ah a pholang tum ih August 10 zaan ah a rual le pawl hmai ah zam ter sin a tum.

“A kai lai cu thinphang phah, thatho phah in kan zoh. Engine a ti nung ih a mei lam pangka her cak tuk cu a siat ih tlunlam pangka a khawng ngah. Tlunlam ih Pangka cu a kiak ih, cumi cun a hngawng a at tlek” tiah a hmun ih umvetu a rualṭha pakhat cun a sim.

Arualle pawl in hmun nai bik Siizung ah an tlanpi nan a thi suak tam tuk cu Siizung an thlen hlan ah a nunnak a cem.

“Ni dang khal ah lukhuh le headphone bun in engine a ti nung sin ṭheu. Kandung baite khalah feet 5 luan tiang a zamter sin. Tlawngkai nihnih zaan ah final test nak a nei. Ziangruangah ti cu ka thei lo nan, khai zaan cu helmet le headphone a bun lo. Cutin, tlun hman a kai so man hlan ah cangsual in a nunnak a liam a si” tiah a rualṭha cun TOI hnen ah a sim.

Ismail hi phun 8 ihsin tlawng a suak ih a upa workshop ah hnaṭuan a si. Thir tham in cooler, Thir bizu, cabuai tivek tuah phah in Thir hman/tham dan thei zettu a si.

Ismail thih thu thawn pehpar in thusutding pakhat a um mi cu “Youtube ih thil kan zirsuak mi hi kan mah le kiangkap hrangah a him mi a si maw”?

Leave a Reply

Your email address will not be published. Required fields are marked *