Wisconsin state ih Vote siar sal ding cun $7.9 million cemliam a ṭul

2020, November 3 ih tuah mi US rampi hrilawknak cu tui ni November 18 khal ah a felfai thei hrih lo ih vote thlak tawlreldan lungkimlo ruangih vote siarsal rero lai khal a um. Vote siar sal beisei nan siar thok hrih lo nak hmun khal a um lai.

Vote siar sal ding beisei nan siar thok ṭan hrih lo nak Wisconsin state ahcun vote siar sal man cu $7.9 million an ngen ih Trump campaign in vote siar man a pek thok ve ten siar thok man cih dinhmun a si ti`n state Elections Commission lam in thuthang an suah.

Wisconsin state ih vote thlak mi unofficial result ah Jeo Biden in votes 20,000 hrawng ngah tam in Donald Trump cu a neh ih Trump campaign lam in neh let leh sal beisei in vote siar sal an beisei mi a si ih vote siar sal ding hrang $7.9 million an pek thei veten, a tlaibik Tlawngkai nili in siar thok theih a si ti`n State cozah ṭuanvonei mipakhat cun a sim.

Pu Trump cun Wisconsin ih vote siar sal nak ding hrang paisa a khong rero zo nan vote siar thok ding maw dinglo timi cu ramkulh cozah hnen ah theihternak a nei hrih lo.

Vote siar sal ding ah hin cozah hnen ah vote siar man pek dingin Daan um cia a si ih kum 2016 hrilawk ṭum khal ah Green Party candidate Jill Stein campaign cun vote siar sal man $2 million cu ramkulh cozah hnen ah an rak pek ve dah a si.

Tu kum ih vote siar sal man a khung cuang mi thu thawn peh par in state Elections Commission director Meagan Wolfe cun “a let rorin a khung cuang nak san cu Covid 19 boruak ruangah a si. Hmun ṭhenkhat ah vote siar tu le zohkhentu cu hmun hla deuh ih um a ṭul ding ruangah hall tumzet hlang a ṭul ding. Cuhleiah a man khung nak san pakhat cu December 1 khelh ih vote siar ṭheh tengteng a ṭul ruangah zamrang le kau zet ih ṭuan lohli a ṭul dingih security hrang ah a hran ten tawlrel a ṭul ding. Kan mah lam in cu vote siar sal kan man zo nan siar maw siar lo ding timi thuthang ziang hman kan dong lo” a ti.

Leave a Reply

Your email address will not be published. Required fields are marked *