VP Mike Pence Covid 19 vaccine dawt lai cu Khuatlang mipi hmu dingin Live in an thlah

US Vice President Mike Pence cun tiamkamnak a neicia vekin Covid 19 vaccine a dawt lai cu Khuatlang mipi mithmuh rori ah Live Tv thlah lai ah Sii a dawt a si.

US ramsung um miṭhenkhat cu a phunphun ruangah Covid 19 vaccine dawt ding an ṭhukṭhun deuh ih, mipi rinhlehnak hlo verver dingin VP Mike Pence cun Sii a dawt lai cu Live Tv ah a thlah a si.

US cozah mithupi deuh pawl lakah Live thlah phah ih Sii dawt hmaisabik a si ih Mike Pence nupi Karen Pence le Surgeon General Jerome Adam te pawl khal Vaccine dawtnak an nei ve cih.

US Vice President le Coronavirus Task Force hotu khal sicihmi Mike Pence cun a himmi Vaccine a si zia le Sii dawt hnu khal ah hmaikhuh bun hrih in Social distance Daan thlun a ṭul hrih thu mipi hnen ah simtheinak a nei cih a si.

Pfizer/BioNTech tuahmi Covid 19 vaccine cu voihnih dawt dingmi a si ih US ramsung ah December 14 in tlangzarhnak an nei thok.

US ramsung ah million 3 zikte tlangzarhmi Covid 19 vaccine cu kum upa, Mina besia le harhdamnak lam hnaṭuan an dawt hmaisabik ih, Moderna company tuahmi Covid 19 vaccine khal FDA in hmansiannak a pe veten US ramsung ah vaccine dawtnak an nei vivo ding a si.

Leave a Reply

Your email address will not be published. Required fields are marked *