Vanzam Mawng Pilot ṭuan a hlawk nawn lo ti`h Hnaṭuan Bansantu An Tam Vivo

Covid 19 boruak hnaṭuan harsat ruangah le a phunphun ruangah Leitlunhuap vanzam mawng pilot tamsawn cu Vanzam mawng hna an ṭuan lo tiah zirzoinak neitu GOOSE Recruitment and industry publication FlightGlobal cun a tarlang.

Pilot 2600 hmangin Mee thlaknak thawn zirzoinak an nei mi a siih Vanzam lam fimthiamnak zirsuaktu pilot zaṭek 43% lawngin atufang ah airline hna an ṭuan ti an hmusuak asi. Zaṭek 30% cu hna neilo in an um ih zaṭek 17% colhlak le hna dang ṭuan zaṭek 10% an um ti a si.

GOOSE Recruitment chief executive officer Mark Charman cun “atu ih hnaṭuan rero lai pilot pawl khalin harsatnak nasaten an tong. Tahṭhimnakah Hong Kong’s Cathay Pacific Airways Ltd in instituted permanent hlawh cu zaṭek 58% rori a ti mal. Turkish Airways le Singapore Airlines Ltd khalin an hnaṭuan thlahlawh an ṭhum sung.”

“Cuvek dinhmun a si ruangah pilot ṭhenkhat cun hnaṭuan an phur lo. Hnaṭuan umlo ruangih Pilot hna bansantu khal an um. Cuhleiah an hnaṭuannak Boss pawl in man neilo, manmal hnaṭuantu dinhmun in mi an zohkhen tiah an hmu. Curuangah hnaṭuan ṭha dang hawltu pilot an tam” a ti.

Zirzoinak an nei mi ih Pilot hnaṭuan bansantu zaṭek 84% cun Covid boruak hi hna kan cawlh san a si an ti. Covid boruak hlan ahcu ramṭhenkhat ih Pilot sambaunak ruangah Vanzam mawng hnaṭuan hlawh khal a kai phah thluh.

Zirzoinak ih telve Pilot pakhat cun “hnaṭuan khal a nuam lo ih thinhar in kan um ringring. Covid 19 nat nei ding le kan phang, thlun dingmi Daan pahbal ding le kan phang. Fehnak ta piang in rinhleh mipa dinhmun ih um ringring khal kan hreh. Cuvek le cuvek ruangah Covid 19 hin ka nunram ah hmapee tumzet a taapter a si” a ti.

Leave a Reply

Your email address will not be published. Required fields are marked *