Utah ramcaar ihsin hlo zo mi “Monolith” vek cu Romania ram ah a suak lala

November thla lai hrawng ah mangbangthlak zetin zoi` phunmi a si ti theih lo mi Thir phun “monolith” cu Utah ramcaar ah a suak ih leitlun mipi an mangbang thluh.

Monolith cu November 18 ah Utah Department of Public Safety le Utah Division of Wildlife Resource in ramhaalnak an nei lai, Utah ramcaar ih hmuhsuahmi a si ih a zuk le video cu social media ah a lar ciamco.

A hmun ih va zohtu minung hnih-thum an um hnu nikhat-hnih ah “monolith” cu zo a si ti thei lo mi in an ṭhiatbal a si tiah Bureau of Land Management – Utah in official in facebook cahmai ih an tarlang lala cu mipi an mangbang thluh lala. Alien thiltuah a si ding titiang ih zumnak neitu khal an um.

Utah ramcaar ih “monolith” a hlo thu, social media ih thuthang a lar rero lai fangah cuvek bangzetmi Thir phun cu Romania ram ah a suak lala.

Romania ram ih “monolith” cu Utah ramcaar ta “monolith” a hlo hnu nazi 24 sungah a suak mi a siih Utah ta thawn malte an dangaw deuh.

Romania, Batca Doamnei tlangpar ih phun mi “monolith” cu Utah ta vek, Thir tleu thawn tuah mi a si nan a par ah zuk vek cangan vek ṭial reihreih in a um.

Romania cozah in a phun tu an theilo thu tlangthannak an nei zo ih, hih thuthawn pehpar in Neamt Culture and Heritage ṭuanvonei Rocsana Josanu in “seven wonder of Romania tiih theih mi cozah ih kilhim mi tlangpar ah an phun mi a siih tu ah zohciangnak kan nei lai. Hih hmun ih thil ti ding cun Ministry of Culture hnen ah siannak dilta ṭul hi a si. Zo in a phun ih ziang hrang ah an tuah ti khal kan thei lo” a ti.

Utah ramcaar ih “Monolith” cu 2001: A Space Odyssey zuknung uar zettu in Flim sung ta cawng in Land art phungpha vekih phun hrim mi siding an zum ih Romania ram ih “Monolith” khal cumi cawng in mi huatsuak in a tuah hrim mi siding an zum.

Leave a Reply

Your email address will not be published. Required fields are marked *