Utah ramcaar ih Thirphun “Monolith” Ṭhiatbaltu A Phuangaw

Zarhkhat-hnih sung, social media ih titi larbik pakhat a si mi Utah ramcaar ih Thirphun monolith cu Bureau of Land Management – Utah in November 27 zaan ah party pakhat in an ṭhiatbal tiah thuthang an ngan.

Cumi thawn pehpar in thuphunphun a suak ih Bureau of Land Management – Utah lam cun a ṭhiatbaltu kan theilo ti`n Facebook ah an tarlang.

Asinan, tu ah, Utah adventure tour guides pawlkom in kan mah i ṭhaitbal mi a si ti`n Thirphun an siat lai video cu TikTok ah an thlah.

Utah ramcaar ih Thirphun monolith cu cozah hnaṭuan ramhaal pawl in November thla sungah an hmusuakmi a siih a hmun ih an va zuk mi le video file tawite cu internet ah a darh thluh. Asinan, social media ih a lar hnu ni malte ah a hlo sal ih mipi hmuah an mangbang thluh.

Tulai boruak thawn leng suakvaklo an tam ih internet hmangtu tamzet lai fang a si phah thawn Utah ramcaar ih hmuhsuahmi Thirphun le a hlosal dan cu Internet ah a lar zet ih alien pawl cangvainak a si ding titiang rak phuangsuaktu an um.

Asinan, tu ah, Monolith ṭhiatbaltu pawl in an siat lai video an thlahsal cu thuho lemte ah a cangsal.

Hih thuthawn pehpar in monolith ṭhiatbaltu lak ih telve Sylvan Christensen cun an ṭhatbal lai video tawi a thlah ih “Lo laksak na duh lo mi na thil cu khuatlang mipi hmunram ah na duhduh in tanta hlah” timi caption ngan in TikTok ah a thlah.

An ṭhiatbalnak a san cu a vehvaitu pawl in hmunram an ti siat thluh ding an phan ruangah a si ih Utah adventure tour guides ṭuanvonei mipakhat cun “thildanglam ah ruat in a ngaihventu an tam vivo. Ahmun ih va zohtu hnih-thum an um zo ih internet khawvel ih a lar dan kan zoh tikah a vehvaiduhtu an tam vivo timi kan hmu suak. Cupawl in an va zoh thluh ngaingai cun motor phunphun thawn nuamceen phah ih vapantu an um dingih hmunram an tisiat thluh ding kan phang ruangah kan ṭhiatbalmi a si” tiah reddit ah a ngan a si.

Romania ram khalah
Utah ramcaar ih “monolith” a siat hnu nazi 24 sungah cuvek bangzetmi Thirphun cu Romania ram ah a suak ve.

Cumi Thirphun cu ft 13 hrawng ih sang a si ih a phuntu an thei lo.

Romania cozah in a phun tu an theilo thu tlangthannak an nei ih Neamt Culture and Heritage ṭuanvonei pawl in zingzoinak an nei tum hnu zaan lai ah a hlo.

Zo in a phun ih zo in a siatsal, ziangduhsan ih phunmi a si tikhal theihcian a si lo nan, miṭhenkhat cun Utah ih an hmu mi “monolith” cawng in mihuatsuak pawl ih tuah men mi siding an zum.

Leave a Reply

Your email address will not be published. Required fields are marked *