US um Chin mi that tum tu kum 25 Thawng an thlak

2020, March thla ah US ram, Texas, Midland khua ih um Pu Bawi Cung Nung le a fapa naam thawn sattu Jose Gomez III, kum 21, cu phun hnam dang huatawknak hate crime thubuai thawn US thuṭhenzung in August 4 ah kum 25 Thawng tlak dingin daan a tat.

Naam satawknak hi Covid boruak lai ah a si ih, Pulh nat mirang ram ah darhtertu ti`n China le Asia ram mi huat an hlawh hlei ce laifang a si ih, Jose Gomez in Pu Bawi Cung Nung tei` sung cu China mi ah ruat in a thlun thup ih Sam’s Club dawr ah naam thawn a sat hai.

Naam thawn a sat dan cipciar cu mirang media pawl ah hitin an tarlang.

“Jose Gomez in dawr ah a thlun hai ih dawr sung ta naamte lak in a ti kuul ih Pu Bawi Cung Nung a thong. A mit le hna lailak ihsin a biang lai tiang hrawng a tlek. (Mehtok can)”

“Cuhnu ah, duh tawk lo in dawr sung ah a lut sal ih inches 8 sau naam a la bet. Cumi thawn dawrkai thilretnak Leeng par ih to Pu Bawi Cung Nung fa le pahnih a sat hai ih kum 6 mi a fapa a sat ngah. A vorhlam mit tlunlam ihsin a vorhlam hna dunglam tiang a zei ngah. A bop a thleng zikte ih a Lu hrek a sat ngah tisehla a sual lo.”

“Sam’s Club dawr ih hnaṭuan Zach Owens le colh la Border Patrol agent Bernie Ramirez in Jose Gomez cu an kai ih Zach Owens khal naam thawn a dawt ngah. Leilung ah an nam bet ih, cuti cingin “America ihsin tlansuak uh” ti`n a auh bet hai.”

An buai lai hmutu pawl rel dan ah ṭhentu um lo seh la a that hai ding an zum ih, Amah Gomez khalin Pu Bawi Cung Nung fapa, kum 6 mi nauhak a that tum thu le a rak ṭhentu Zach Owens naam thawn a dawt thu cu thuṭhenzung ah a phuangaw thluh.

Atu ih kum 25 Thawng an thlak mi cu hate crime thubuai hrang lawng a si lai ih mithat tum le mi kut thlak thubuai dang rel sak ding a um hrih lai.

Pu Bawi Cung Nung te` cu Texas, Midland ih um an si ih, kum 2014 ah US thlengmi an si. Kawlram ih an khua cu Thantlang peng, Thau khua a si nan, Kalaymyo ih khawsa an si.

Leave a Reply

Your email address will not be published. Required fields are marked *