US ramsung buainak so sang (+Video)

US ramsung vun rong thleidan awknak tam ruangah le Palik kut sung ih midum thi an tamtuk zo ruangih mipi thinhennak cu May 25 tlawngkai nikhat sun ih thilcang in a rung pehzom bet ruangah mipi pawl thinhennak cu a puakkuai thluh ih US ramsung hmun ṭhenkhat ah buainak nasa zetin a suak.

Hih buainak cu Minneapolis palik in paisa lem thuhla thawn pehpar in midum George Floyd kaih an tum nakin a thok. Palik pawl simdan ah cun George Floyd an kaihtum lai ih kutthlaknak ruangih thilcang vekin an sim. Asinan an buai lai tak ih an zuk mi video ah cun hriamhrei zianghman keng lo George cu leilung ah an bawk ter ih Palik pakhat in a hngawng ah a khuk thawn a nen. Ka thaw ṭha theilo tiin a au rero nan thlah duhlo in a nen ringringnak ruangih thi in a lang.

May 26 zaanlam ah mibur za luan cun George Floyd thihnak hmun ah feh in duhphorhnak an nei thok ih mipi dang pawl khal in an telpi vivo hnu 27 zaan ihsin buainak napin a suak.

Miburpi cun lungto thawn palik pawl an deng ih palik lam khal in miburpi cu ṭhekdarh ṭheh tum in tear gas, flash bang thawn an kap ve.

Mipi thinhennak cu a sosang vivo ih mawtaw siatsuah in inn tiang in an khang. US ramsung khaw dangdang khal ah hih thuthawn pehpar in duhphorhnak an nei ih buainak cu a pehzom vivo.

ref: SBI, TCA

Leave a Reply

Your email address will not be published. Required fields are marked *