US ram Tlawng ongsaaltum thu ah, Mithiruak Kuang kengin DUHPHORHNAK nei

Covid 19 natnak thawn mithi, damlotu pung vivo cingin US ram hmun ṭhenkhat pawl ah Tlawng phuan tum tho a si ruangah Tlawngta, saya/ma le nu le pa pawl in an lung kim lo thu, duhphorhnak an nei.

“Covid 19 damlonak thawn Nu le pa, saya/ma le sungkhat u nau besia zet in siizung an thleng lai ah nauhak pawl in fimzirnak lam ah an thinlung an pe thei lo” tin au phah in duhphorhnak an nei ih “Saya/ma le tlawngta pawl thi ṭheh hai seh ti thawn a bangrep a si, tiah, tlawngta, saya/ma le nu le pa pawl in mithi kuang zawn phah in duhphorhnak an nei.

Tlawng ong ding cu Thihnak sangka ong thawn a bangaw ti`n duhphorhnak an nei

Chicago elementary tlawng saya Andrea Parker cun “ka tlawngta pawl nunnak thap in tlawng ongsaal ding cu a si theilo hrimhrim, Cozah ih experiment tuahnak men ah ka nun ka thap theilo” ti`n Reuter hnen ah a sim a si.

New York khuapi khal ah mipum za luan in, Covid 19 boruak ih Tlawng ong saalding ṭihnungzia langter in duhphorhnak an nei ih mithi kuang, Thlanlung le “tlawngta nauhak homework tuah pi tu Grandma in Covid 19 nathrik a kaai, R.I.P.” timi cangan keng phah in lamziin an zawh a si.

Tu ah, US ramhuap Coronavirus Case 5,032,547 a um zo ih mithi 162,805 an um zo ruangah, a ninii ih siatlam panvivo lo ding duhsan thawn Tlawngta, saya/ma, nu le pa pawl in duhphorhnak an nei a si.

Leave a Reply

Your email address will not be published. Required fields are marked *

error: hahahahahaha !!