US ram khal ah ei-in tlasam mi harsa an tam, Rawl dong ding in Motor Thawngtel an tlar

Covid 19 ruangah leitlun hmuntinkim ah tlaksiatnak a thleng ih hnaṭuan nei lo mi harsa a ni ni in an pung vivo.

Leitlun Covid 19 nat karhzaibiknak US rampi khal ah a ni ni in hnaṭuan neilo mi harsa an tam vivo ih ei le in harsa in vansang mangbang ih khawsa an tam zet.

Cutiih, tlaksiat harsatnak tongtu a ni ni ih an pung vivo lai ah North Texas Food Bank (NTFB) cun Dallas, Fair Park ah ei-in zemnak an nei ih rawl dong ding in motor Thawngtel an tlar.

North Texas Food Bank ih zem mi ei-in rawl cu mipum 25000 hrawng deih dingih tawlrelmi a siih Vui arsa 7000 luan tel in ei-in rawl pounds 600,000 rit a si.

North Texas Food Bank (NTFB) Official

“Hih hmun ih ei-in zemnak hi Covid 19 boruak thok ihsin a voi 5 nak a si thlang ih tuṭum ih rawl ra dongtu zaṭek 40 hrawng cu voikhat hman ra dong dah lo tu an si. Covid 19 boruak ruangah mi harsa kan tam vivo timi a lang a si” tiah rawl zem tawlreltu ṭuanvonei Mitchell Ward cun CBS hnen ah asim ih “himi rawl zem tawlrelnak cangsuak dingih in bawmtu North Texas Food Bank, Tarrant County Food Bank, Baptist Ministers Union le volunteers pawl tawlreltu local pastor hnen ah lungawithu ka sim duh” a ti.

Texas hi US ramsung ih Covid 19 mina million 1 kim hmaisabik state a si ih hnaṭuan neilo mi harsa an tamzet ruangah a tui rawl zem mi hi a ṭangkai pi an tam zet.

Rawl dong ding in motor thawn tlar vetu mipakhat cun “Kan dung kum December ihsin hna ka ṭuan lo. Hnaṭuan ding ka hawl rero nan ka hmu thei lo ih ei le in tlasam lai ah hivek rawl dong ding a um hi cu thlawsuah pakhat rori a si” a ti.

Ei-in rawl pawl cu pawlkom, bulpak le U.S. Department of Agriculture ih hlu mi a siih tuṭum ah ei le in tlasam innsang 8500 hrawng hnen ah rawl an zem a si.

Leave a Reply

Your email address will not be published. Required fields are marked *