US ram Cozah hmuan ah Diamond 9.07-carat Sar Suak

Arkansas, US ram um bank manager Kevin Kinard cun state cozah hmuan a si mi Crater of Diamonds State Park ah hlumṭek tia Diamond a sar.

Crater of Diamonds State Park cu Diamond suaknak hmun pakhat a siih tukum sung lawng ah Diamond 246 an sar zo.

Hih hmun ah 1906 kum ihsin Diamond an sar thok ih hmunram neitu Arkansas Diamond Company and Ozark Diamond Mines Corporation hnen in 1972 kum ah Arkansas Department of Parks and Tourism in hmunram a lei.

Cuhnu in, State cozah in Diamond suak nak hmuanpi cu mipi hrangah a lak in a ong ih a peihpeih in Diamond hawl theih a si.

September 7, US Labor day ih Diamond sartu Kevin Kinard cun, “a tleu mi hmuahhmuah cu ka zal ah ka san thluh. Atleu cuang zet mi pakhat ka hmu ih a danglam cuang tiin ka pai” tiah local media hnen ah a sim ih “Thlalang siding zum nawn in ka pai meimei” a ti.

A rualpi thawn an suak zawngah lungmankhung siding an zum mi, an sar mi pawl cu Diamond Discovery Center ah an check ter ih Kinard sar mi hlumṭek tia hrawng thil tleu cu Diamond a rak si ziar.

Amah cun,”zianghman hmu ding ka zum aw lo ih check nak counter ah zohter ka tum lo. Ka rualpi pawl in an pan ruangah ka thlun hai men ih ka vun check ter ve cu Diamond a rak si. Phehthuloin, in vun sim ciah cu ka lungawi tuk ah ka mitthli tlak. Ka mangbang tuk rori” a ti.

Diamond cu 9.07-carat a siih Crater of Diamonds State Park sungih Diamond sar mi hmuahhmuah lakih tumbik sangtu a si. Aman cu relciangnak a um hrih lo ih, tuhlan ih sar mi Diamond “Amarillo Starlight” 7.54 carats cu $150,000 man hrawng a si. (NYPost)

Leave a Reply

Your email address will not be published. Required fields are marked *