US ram ah Covid 19 Vaccine an dawt thok

Leitlun huap Covid 19 nat nei tambiknak US ram ah December 14, Tlawngkai nikhat zinglam nazi 9 in Pfizer/BioNTech tuah mi Covid 19 vaccine Sii an dawt thok.

Mipi ih hngakhlap zetmi Covid 19 vaccine cu Kum upa, Mina besia le harhdamnak lam hnaṭuan pawl an dawt hmaisabik.

FDA in Covid 19 vaccine hmansiannak a pe hnu US ramsung ih Sii dawt hmaisabik cu Queens, New York, Long Island Jewish Medical Center ih hnaṭuan Sandra Lindsay a siih, a mah cun “kan san thuanthu ih tlaksiat vanduainak rapthlak suakmi a tawp hramṭan ni a si ka beisei” a ti.

FDA in Covid 19 vaccine hmansiannak a pe thlang ding tiih thuthang a suak veten Sii tlangzarh dingmi timlamnak nei cia a rak si ruangah US ramsung ih Sii hmansian a si veten ramsung pumhuap hmuntinkim ah zamrang zetin tlangzarhnak an nei thei cih.

Sii vai a thleng veten ramsung hmuntinkim deuh thaw ah Tlawngkai nikhat zingin Sii dawtnak an nei thok ih, Ohio State University Wexner Medical Center Sii dawtnak an nei cu harhdamnak lam hnaṭuan pawl cun “three, two, one, vaccinate” tiih an au hnu ah a rualrual in Covid 19 vaccine dawtnak an nei.

Covid 19 vaccine cu voihnih dawt ding a siih, a tu ṭum, US ramsung ah Pfizer/BioNTech tuahmi Covid 19 vaccine cu doses 3 million kim zik hrawng tlangzarhnak an nei hmaisa ding.

US cozahpi in Moderna company tuahmi Covid 19 vaccine khal doses million 100 a cah zo ih FDA lam in hmansiannak a pe veten US ramsung ah December thla sungah doses 20 million hrawng tlangzarhnak an nei bet ding a si.

Tu dinhmun ah US ramsung ah Covid 19 mina 16.4 million an um zo ih cumi ah minung 299K an thi zo a si.

Leave a Reply

Your email address will not be published. Required fields are marked *