US : Journalists pawl khal January 20 hrang timlamnak an nei thok

January 20 ih tuah dingmi US President thuneihnak hlanaw ni cu himzet le tluang zetih tuahsuakthei dingin US cozahpi in timlamnak a nei rero, Cuvek ṭhiamṭhiam in cuih hmun ih telve tuding news phuangtu/Journalists pawl khalin an him thei nak dingin timlamnak an nei ve.

“Inauguration ni ih news cover tu ding ka si. Kan boss bikin cerek teilo lukhuh in kuat zo. Hivek dinhmun kan thleng hi cu mak ka ti zet. Leitlun hmunhimbik tiih ruah mi Washington D.C. rori ah hivek thuamhnaw hruk ih news cover ding cu ka rak ruat dah ngelcel lo” ti`n Newsday media ih hnaṭuan Laura Figueroa Hernandez in a ti.

Laura cun “News phuangtu ṭaangben tacik khal langsar in ka ti lang lo ding. Asan cu kan kiangkap ih umtuding pawl cu zo an si, ziangvek lungput an nei timi kan thei lo. Thudik news kan phuang mi rak hua tu khal an si thei. Curuangah ralrin ṭul zet” a ti.

Leitlun ih hmun him bik tiih ruah mi US Tlangbawizungpi cu Pu Trump ṭantu pawl in January 6 ah an siim. Cuih siimawknak rapthlak cu American mipi mitthlam ah a caam caanciin hrih. Rinlopin ralhraang an tho lala pang pei maw timi ruahnak cu an Lung ah a caam caanciin hrih.

Laura cun “January 6 ih thil thleng cu a cangsuak zomi a si. Asinan a tawp zo ti`n ka ruat lo. Inauguration ni khalah buainak a suak sal loding ti kan sim thei lo. Curuangah mah le bulpak khalin timlamnak kan nei cia ṭul” a ti.

Media pawlkom tamzet khalin Inauguration ni ih news cover tuding an journalist pawl him theinak dingin hmalaknak nasaten an nei ih tear gas lakih humhimawknak hmaikhuh, cerek teilo Awm/Ṭaangkhuh le Lukhuh an retaw cia ṭhepṭhep a si.

2020, US rampi hrilawknak ih nehnak cotu Joe Biden cu mipi tel loin January 20 sun hnu ah US President thuneihnak an hlan ding a si.

Leave a Reply

Your email address will not be published. Required fields are marked *

error: hahahahahaha !!