US : Ṭumhnihnak Covid 19 vaccine covo ngah tuding!

Leitlun huap Covid 19 mina tambiknak US ram cun voihnihnak Covid 19 vaccine dawt dan ding hmalaknak a nei thok tum ih Centers for Disease Control and Prevention expert advisors pawl cun ṭuanlo theihlo hnaṭuantu pawl (Tlawng saya/ma, Cozah hnaṭuan zung kai ṭul ringring tvk)le kum 74 luan upa pawl dawt hmaisabik dingin thuburnak an nei.

Sii dawt dan ding cu Center lam in thuthluknak a tuah ṭheu nan CDC’s Advisory Committee on Immunization Practices (ACIP) ih thuburmi hi Center lam in an ngai poimawh zet. Kan dung zarh, US ramsung ih Covid 19 vaccine an dawt thok mi khal cu ACIP pawl ih thuburmi vekin Nursing home ih um kum upa le Harhdamnak lam ih hnaṭuan pawl an dawt hmaisabik.

“Enkolcawp ṭul pitar/putar le Harhdamnak lam hnaṭuan pawl Vaccine an dawt ṭheh hnu ah ṭuanlo theihlo hnaṭuatu (frontline essential worker) le kum 74 luan pawl hi dawt hmaisabik dingin thuburnak kan nei.

Asan cu Covid 19 ruangah ṭuanlo theihlo hnaṭuantu minung thawngteel an thi ih US ram lawng ah kum 75 luan zo kum upa pawl khal Covid 19 thawn pehpar ruangih thi minung 80,000 lenglo an um zo. Curuangah an mah pawl hi Vaccine dawt hmaisa dingin thuburnak kan nei” tiah ACIP ṭuanvonei mipakhat in VWN hnen ah a sim.

Pfizer-BioNTech tuahmi Covid 19 vaccine cu FDA in hmansiannak a pe hnu, December 14 in US ramsung ah tlangzarhnak an nei thok.

“Ṭumhnihnak dawt an si hnu ah Voithumnak cu food service, legal profession, media le kum 16 luan damlonak nei tivek, minung 57 million lenglo cu Covid 19 vaccine dawt an si ding. Moderna tuahmi Covid 19 vaccine khal Food and Drug Administration in emergency hrang hmangtheih dingin siannak a pe zo ih tikcucaan reilo te ah rampi huap in dawt ṭheh felfai an si ding” tiah ACIP ih ṭuanvo neitu cun a sim peh bet.

US ram ah Covid 19 mina 317,000 lenglo an thi zo ih tu ah 113,000 lenglo cu Siizung ah tuamhlawm in an um a si.

Leave a Reply

Your email address will not be published. Required fields are marked *