UFO in, in dawi ciam co cu Ninga sung ka khur – Miley Cyrus

UFO zam lai video lar mi thu ah US ralkap zungpi Pentagon in tu kum thok lam ah simfiahnak an nei ih, mi ṭhenkhat ruat vekin a lem a si lo thu, ralkap vanzam thawn an dawi nan an man thei lo thu tvk cu official in phuangnak an nei.

Pentagon in simfiahnak a nei hnu thla khat luan hrawng ah hlasakthiam Miley Cyrus in UFO in, in dawi a ti.

Aire rawng ih a tleu zukzo mi UFO thuhla cu tu thla hrang suah ding mi “Interview” megazine hrang ah Rick Owens thawn hmaton thusutnak an nei nakah Miley Cyrus in a sim mi a si.

Hmaton thusutnak an nei lai ah Area 51 thuhla an relsuak ih thusuttu Rick Owens cun “Alien hi um ding ka zum ciah lo. Nan, ramri um ve lo mi kan universe ah kan mah lawng minung kan um ti`h ruat ding cun a at thlak tuk lala fawn si” a ti`h Miley cun “Ka ruah dan vek ciah si.”

“Ka rualpi thawn San Bernardino kan feh lai ah UFO bang deuh mi in, in dawi ciamco. Ka hmu rori ti cu ka sim ngam. Nan, siichauh ka fawp mi effect khal si thei tin ka ruat.”

“Asinan aire rong tleu zukzo a zam mi cu ka hmu rori. Ka rualpi khal in an hmu. Motor 4-5 hrawng khal an cawl ih an zoh ta. Curuangah UFO a si ciang ko” ti`n Miley Cyrus cun Rick Owens hnen ah a sim ih “ka ṭih tuk taakah ni 5 sunglai ka khur. Ka ruahnak in a suak thei lo ih van lam khal ka zoh ngam lo lawk. An ra kir sal pang ding ka phang” a ti.

Miley Cyrus cun “In tuahmawh pang ding tivek cu ka phang hran lo. Nan, UFO totu thawn kan mit a tawngaw cu ka hnin durdo thei. Ka hmu dah mi a si lo tikah ṭihphang in ziang khal ka ruat thei lo. Curuangah na sim vekin ramri neilomi universe sung ih kan mah lawng a nung mi kan um ti`h ruat cu a at thlak tuk rori” a ti.

Leave a Reply

Your email address will not be published. Required fields are marked *