UFC star Michael Bisping in Youtuber Jake Paul ih Ngairnak a co hlang

Tulaifang MMA khawvel ih titii lar cuang pakhat cu Youtuber Jake Paul thuhla a si.

Amah hi professional Boxing khawvel ah voihnih a tel ih a voikhat boxing thongnak cu tukum thok January 30 ah a si. Amahvek youtuber AnEsonGib thawn an sualaw ih technical knockout in round 5 nakah nehnak a co.

Voihnihnak cu September 12 ih tuahmi Mike Tyson vs. Roy Jones Jr. boxing thongaw ṭum ah a siih professional basketball player Nate Robinson cu round khat nakah a knockout.

Voihnih nehnak a co hnu in Jake Paul cu a ṭongkam a por thok ih MMA khawvel ih hminthang deuh pawl a hro/ngair ciamco thok.

Hmaisabik ah MMA arsi Conor MeGregor a ngair thok ih ṭongkam mawilo hmangin a nupi khal a ṭong san. “Sualaw dingih ka lo ngair mi na cohlang le $million 50 ka lo pe ding” titiang in a ngair nan Conor McGregor cun ti tham lo ah a ruat ruangah zianghman a ṭong let lo.

Atongkam hman mi a mawilotuk ruangah Conor McGregor ralpa Nate Diaz lamlam a rak thinheng ve ih khavek ṭongkam thlahdah mipuar thau cu paisa pek ṭul lo in ka hrut ciamco cak ti`n Jack Paul kawk phah in Twitter ah Ca a thlah ih Jake Paul khalin duh ve ce loin Twitter ah a hro ve ciamco. Asinan an pahnih karlak cu tufang ah a dai hrih.

Nan, tu ah, Jake Paul ih cangvaihdan rak mitkemtu UFC Middleweight Champion rak sidah Michael Bisping cu supaw thei nawnlo in Jack Paul thuhla a ṭong suak.

Michale Bisping cun a mai` podcast a simi Believe You Me ah Jake Paul thuhla a ṭongsuak ih “i ngair mi ka cohlang a ti”.

Michale Bisping cun “na duhduh in na ṭong tlun ah ka manager tiang na rak pehtlaih. Curuangah na ngam ngaingai a si cun kan sual aw ding. Nang cun boxing ah 2-0 ka si na ti. Kei boxing ka thong dah lo. Ka record cu 0-0 a si. Asinan na ngam ngaingai ahcun Boxing kan thongaw ding. I ngairnak ka co hlang” a ti.

Michale Bisping cu MMA khawvel ah kum reizet rak tlangleng zotu a siih UFC lawng hman ah kum 2004 lai in a rak tel zo. Tu ah MMA in a cawl zo nan Jake Paul thawn sualaw ngai bang hai seh la Bisping in a neh neekneek ding tiah MMA thaimsang pawl in zumnak an nei.

Leave a Reply

Your email address will not be published. Required fields are marked *

error: hahahahahaha !!