UFC fighter Irwin Rivera in a nau le itthat lai Naam thawn a dawt ciamco

UFC fighter Irwin Rivera cu mithattum thubuai thawn Florida, Boynton Beach Palik in an kai tiah ESPN in a tarlang.

Kum 22 mi le kum 33 mi a naunute pahnih naam thawn a dawt ruangah kaihkhih a tuar ti a si ih naam dawt tuar mi pahnih cu Siizung lam ah an tlanpi cih tiah an tarlang.

Upa deuh cu a dunglam, a lu le a baan ah naamdawt hliamhma a tuar. Nautasawn cu a dunglam, a biang, a baan le a kut pawl ah naamdawt hliamhma a tuar ih, tu ah nungdam in Siizungpi ah tuamhlawm in an um.

Palik ṭuanvonei pakhat cun “upa sawn in, ka uu Rivera inn ah kan riak ih zaan kan itthat lai ah naam thawn in ra dawt ciamco. Cule a tlan suak cih ti`n in sim” a ti.

Rivera cu a nau le naam thawn a dawt ṭheh le veten inn ihsin a tlan suak ih January 7 zinglam nazi 7 (ET) hrawng ah palik in an kai ngah sal.

Amah cun “an itthat lai ah kutzung hrolhnak um mi naamte tawi thawn ka nau le ka dawt that hai. Huham neizetmi in i fial ruangah ka tuah mi a si” ti`n palik hnen ah a sim.

Irwin Rivera buainak thu thawn pehparin Ultimate Fighting Chiampionship pawlkom lam in thuthannak an nei ih cumi ah “UFC fighter Irwin Rivera thawn pehparmi buainak a um timi thuthang kan dong. Amah finkhawitu manager hnen khalin ‘lungbuai thluakbuai deuh vekin a um” tiah thuthang kan dong. Kan mah lam khalin thuhla zingzoinak kan nei lai. Hivekih buainak a um ruangah tui` dinhmun ahcun kan pawlkom sualawknak ah telter hrihlo dingin thuthluknak kan nei ih amah finkhawitu hnen khalah theihternak kan nei zo” tiah an ngan.

Kum 31 mi Irwin Rivera cu Sualaw zuamawnak UFC ih a tel netabik cu September 19, 2020 (UFC Fight Night: Covington vs. Woodley) ah a si ih cuih ṭum ah nehnak a co. Amah hi Titan FC ah bantamweight champion a rak si dah.

Leave a Reply

Your email address will not be published. Required fields are marked *