Typhoon Goni in Philippines ram a nuai, Thlisia Atsani in Nuai Bet tum in a Nawp Aw

2020 kumsung, Thlisia huuk mi lak ih thacakbik Typhoon Goni cun November thla thok ah Philippines ram hmun ṭhenkhat a nuai ih minung 16 an thi.

Thlisia huuk nak Catanduanes province hmun tamzet ah tidai a lik ih ciarbek in a khat hlei ah meisa a siat thluh. Albay province kiangkap ih inn 300 lenglo cu Mayon meisaTlang ihsin luang mi lungto le ciarbek in a khuh thluh.

Typhoon Goni cu tu kum sung Philippines ram ih thlisia huuk mi voi 18 nak a siih cozah lam in mipi humhim dingin tiimlamnak an rak nei cia ruangah mithi an dem deuh tiah Philippine Red Cross in thuthang an suah.

Philippines ram hi asia ram ih Covid 19 nathrik hmuhsuahtambik ram 6 nak a siih nathrik kai mipum 385k um in mithi 7000 luan an um.

Cutiih Covid 19 boruak buai lai, October thla sung ah Typhoon Molave thlisia in nasaten a rak nuai zo ih minung 22 lai an thi.

Cuih thlisia ih thlen mi siatralnak ihsin an tungdingawman hlan ah Typhoon Goni thlisia in a nuai lala ruangah an ram in a tuar na cuang.

Cuhleiah Pacific tipithuanthum lam ah Atsani tiih hmin pek mi thlisia cu Philippines ram lam pan thei dinhmun in a nawp aw rero lai tiah CBS media in a ngan.

Leave a Reply

Your email address will not be published. Required fields are marked *