Twilight zuknung Arsi Robert Pattinson in Covid – 19 nat a Kai

Cangtubik dinhmun in Batman zuknung thar zuk rero tu Robert Pattinson cu Covid 19 nat a kai tiah US media pawl in an tarlang.

Batman zuknung tawlreltu Warner Bros ṭuanvo nei pakhat cun, “Batman zuknung thar tawlrelnak ih telve mi nih, Covid 19 nat a kai. Curuangah Batman zuknung tawlrelnak cu caamkhat sung kan cawl lawk a si” ti`n US media hnen ah asim.

Zobik a damlo ti cu an phuang tel lo nan, rinsantlak US media ṭhenkhat in Robert Pattinson a si an ti.

Twilight zuknung Arsi Robert Pattinson (kum 34) cu Batman cangtu dingah hrilsuak thar mi a siih, a tu an zuk rero lai mi “The Batman” zuknung cu 1 October, 2021 ah tlangzarhnak an neitum a si.

Robert Douglas Thomas Pattinson (pian kum 13 May 1986) cu England ram mi a siih Harry Potter and the Goblet zuknungah Cedric Diggory ah cangin, zuknung khawvel (film career) ih ke kar thok mi a si.

ref:HollywoodReporter

Leave a Reply

Your email address will not be published. Required fields are marked *