TV lemcang hminthang Malvi Malhotra in Naam Dawt A Tuar

Mumbai ih um TV lemcang hminthang Malvi Malhotra cu a pum le a kut ah naam dawt a tuar ruangah Siizung a thleng.

Naam thawn dawttu cu TV producer Yogesh Mahipal Singh a siih ṭhitdilnak a el ruangah a kut ah voikhat, a pum ah voihnih a dawt ih a tlan hlo ti`n Mumbai palik in thuthang an suah.

Naam dawt tuartu Malvi Malhotra in, “Yogesh in 2019 ah Facebook friend request in kuat ih cutin kan thei aw thok. Kan chat aw ṭheu ih voi 3-4 hrawng coffee dawr ah kan tongaw. Innel deuh cin in ṭhit in dil.”

“Ka duh lo ruangah ka biak duh nawn lo nan, ka feh nak in thlun thup ṭheu. Dubai ih shooting kan ṭheh hnu, zarhpi zaan ka tlung ah ka inn hnuai in i rak hngak nan ka biak lo ih ka so lan cih” tiah Mumbai palik hnen ah a sim.

26 October zaan nazi 9 hrawng ah Malvi Malhotra cu coffee dawr in a tlung ih Yogesh cun motor thawn a thlun. Thu an elaw phah ih an ṭongkam a sang vivo hnu ah Yogesh cun naamte a phorh ih Malvi pum ah voihnih, a kut ah voikhat a dawt hnu ah a tlan.

Kiangkap um pawl in Malvi Malhotra cu Siizung ah an tlanpi lohli ih an tuamhlawm hnu ah a nunnak hrang tiang ṭih a nung lo tiah Siibawi in palik hnen ah a sim.

Sual tuahtu TV producer Yogesh Mahipal Singh cu Indian panel code section 307 thawn thubuai tuah sak a si ih thuhla ciang zingzoinak an nei rero lai tiah NDTV in a phuang a si.

Leave a Reply

Your email address will not be published. Required fields are marked *