Tuksumza President Vladimir Putin thusuah

Russia in Ukraine a luhcilh hnu, a ni 4 nakah Russia President Vladimir Putin cun Moscow ih Nuclear ralthuam pawl ralring cia dingin thu a suah.

Leitlunpi hrang ṭihnung zetmi nuclear ralthuam pawl ralring cia dingih thu a suah nak san cu NATO in Russia a dodal hlei ah Nitlaknak lam ram pawl in pursum tuahnak lam an phit sak ruangah ti a si.

“Nan hmu thiam ko lo maw, Nitlaknak lam ram pawl in kan ram dung in hoih san hlei ah cohlan theih lo mi pursumlam hremawknak an tuah. NATO hruaitu pawl in kan ram dem nak hrang tha an pe” tiah President Vladimir Putin cun a rel ih, a thusuah cu Defence Minister Shoigu khalin a cohlang zo.

Leitlup rampicang pawl le Russia cozah hmuawthiamlonak cu Putin thusuah mi hin a ti sosang sinsin ih, atufang thu um dan cu nuclear ralpi tho thei dinhmun a si tiah mithaim pawl in an rel.

Russia khawpi Moscow cu khawpi zawngin leitlun nuclear ralthuam neiṭhabik pahnihnak a si ih Russia hrangih hmun thupibik pakhat khal a si.

Mithiam pawl rel dan ah tu dinhmun tiang NATO le Leitlun rampicang pawl in ralkap thazaang hmangin Ukraine an bawm lo nak san cu nuclear ralpi a tho ding an phang ruangah a si tiah an rel.

Mithiam pakhat cun “Nuclear ralthuam hmangin Leitlun ralpi voithumnak a tho pang cun zo in nehnak a co tivek a um thei nawn lo. Kan zaten kan sung thluh” tiah a ti.

Mifim Albert Einstein khalin hitin a rel dah. “Leitlun ralpi voithumnak ah ziangvek ralthuam thawn an do aw ding ti cu ka thei lo. Nan, voi 4 nak leitlun ralpi ahcun Lungtum, Fung, Thal an hmang ding” a ti.

Leave a Reply

Your email address will not be published. Required fields are marked *