Tuhlan Kum 33 luan zo, Tuni vek June 5 ih China ram thilthleng maksak

Mipakhat in ralṭha zetin lamzin lai ah raldonak Tank pawl a kham laifang zuk/video hi internet hmangtu tamsawn cun kan hmu zo ding zum a um.

Amah hi zo a si ti a thei ciangtu an um lo ih “Tank man” tiah hmin an pe. China cozah in Beijing, Tiananmen tualrawn ih duhphorhtu Tlawngta le mipi tamzet an kap that hnu, June 5, 1989 ah a si ih Tiananmen tualrawn suahsan tumtu Tank rual cu nunnak thap rorin mipakhat in a rak kham. Tank riangri sawn in a kian tum nan an feh tum nakah a ṭhawt vivo. A par khal ah a kai ih a sung um pawl a be lawk. A ṭum sal ih Tank feh tum sal cu a kham bet.

Culaifang cu video rak zuktu an um ih cuih zuknungtawi cu leitlunhuap in a darh ih tuni tiang zohṭhimtlak mimaktara a si ti`n fak a hlawh zet ih a lar zet.

“Tank man” hi zo a si ti theiciangtu an um lo bangin himi hnu ah ziang a cang ti khal felfaitei` ngankhummi ziang hman a um lo. Bulpak le Media ṭhenkhat cun cumi kha mi a si ti`n thu an suah nan tuini tiang thuhla felfai nemhngetmi hmuh ding a um lo.

Nan, hih hmun ah ka um ve tiawtu ṭhenkhat cun Tank khamtu hi amah lawng a si lo an ti. Mi zuktu in amah lawng a zuk ngah ruangah a si ti`n an rel.

“Tank man” hi huham a nei tuk ih China cozah in tuni tiang a ramsung ah duh tapiang zoh theih lo dingin a kham. Online ah a thuhla rel a khap ih, cuih ṭum buainak thawn pehparmi caan serh hmang khal a kham. Ramdang thleng zo an mah ramsungmi rori khalin ramleng kan thleng hnu lawngah hih thu ka thei titu santhar mino an tam.

Beijing, Tiananmen tualrawn ah ziang a cang?

Kum 1989, Tiananmen tualrawn thahawknak hi “June Fourth Incident” lole “Tiananmen Square Incident/Massacre” ti`n an ko.

Rampi ukhruaiawkdan tidanglam dil in Tlawngta kaihruainak thawn duhphorhnak neih a si ih, hmun hranhran ah zarh teel in duhphorhnak neih a si hnu, Tiananmen Square ih mipi cu June 3 zaan in China cozah in Tank le ralthuam phunphun thawn an ciil.

Tank thawn rial that mi khal an tam zet ti a si ih mithi um zat hi tuini tiang China cozah in fiangfaiin a phuang duh lo. Cuhleiah cuih buainak cu santhuanthu ihsin malh hlo an tum.

Buai pekte ih China cozah thusuah mi ah mipi 200 hrawng le ralkap tamzet an thi ti`n tarlang a si nan, kum 2017 ih China cozah sung ihsin rintlak thuthang puutdarhmi ah mipi 10000 lenglo an thi ti`n report a um.

China cozah cun hih thu hi tuini tiang thuhhlo an tum ih mithi um zat siseh buainak thuhla le hih thu thawn pehparmi caan serh hman tivek an khap a si.

Leave a Reply

Your email address will not be published. Required fields are marked *