Tuahcawp Zuk in Ka Nunkhua I Siatsuah – Taiwan model Heidi Yeh

Kum 2012 ah International Chinese media Heilongjiang Morning Post ah “China milain pa in an mai` hmuaihmel zon lomi fa pathum neisuaktu a nupi taya a cuai ih a neh” timi cahram le nuahak hmelsia pathum telmi Innsang zuk cu online ah a thlah. Cuih cahram diklo le zuk tuahcawp cun Taiwan model Heidi Yeh nuntluan ah tlaksiatnak tumpi a thlengter.

Ca sung ah cu, “Mi hmelsia numi pakhat cun mawi dingin surgery a tuah ih pasal milian hmelṭha a tong phah. Apasal thawn nuam zetin an um tlang ih fa pakhat an nei. Naute cu a hmel sia tukih a nu le pa hmuaihmel a zon lo ruangah inntekpa a lung hring deuh. Fa pahnih an nei bet ih an hmuaihmel keng lo hlir an piang ruangah an pa cun zingzoinak a nei ih a nupi hmelsiat zia le surgery tuah ruangah mawivekin a lang timi a hmusuak. Curuangah an nu cu tayacuai in neh nak a co” tiah an ngan.

Cuih zuk cu internet ah an share sawng vivo ih leitlun hmuntinkim ah a darh ṭheh. Memes lar ah a hung cang ih “Plastic Surgery na tuah khal le na si nak dik cu kum khua in na thup thei lo” timi ca ngan tel in hnihsuaksainak ah a hung cang.

TuahCawp Zuk Le Thuthang Diklo in Ka Nun Lai Ah I Thih Ter – Taiwan Model Heidi Yeh

Taiwan mi Heidi Yeh cu model khawvel a luh nak kum 2 (2000) hrawngah international advertising agency J Walter Thompson (JWT) thawn plastic surgery clinic hrang ah thehlarnak zukaw dingin contact an tuah.

Cuih zuk cu newspaper hrang lawng ah zuk mi a si nan JWT in Simple Beauty timi company pakhat a hmang sawng ter. Simple Beauty company cun zuk sung ih nauhak pathum hmuihmelsia dingin photoshop a tuah hnu ah “Na fa le pawl simfiang ding lawng, na don har ding a um” timi ca telh in company thehlar nakah hmang phah in online ah an thlah.

Cutin, cuih zuk cu fact check ta loin media dangdang nih an lak sawng ih online ah an thlah ciamco ih a hung lar thok.

Hih thuhla ah BBC in documentary tawite a tuah ih, video sung ah cun, “Surgery khal ka tuah dah lo. Hmel remcawp in pasal ṭha a nei thei ti`n thuphan thuthang an ngan. JWT thawn thehlarnak kan zuk mi cu Simple Beauty in a rem bet ih a diklo zawng in online ah a thlah.”

“Phuahcawp thuthang le zuk cu leitlun mipi pawl in a tak ah an ruat. Kan ramsung khal ah a tak ah an ruat. Curuangah model khawvel ah company pawl in, in hmang duh nawn lo. Ka nun cu a cem rori si ko” ti`n Model Heidi Yeh cun ṭap phah in a sim ih “media ṭhenkhat cun Model khawvel ah hminthang sin tumin thu a phuah ti`n in puh bet” a ti.

Thuhla umdandik a suak hnu ah Chinese newspaper Heilongjiang Morning Post in ngaidam an dil ih Heidi Yeh cun “fact check ta lo in thuthang nan ngan ruangah ka nun khua a sia thluh ih $100,000 hrawng laklutding hrisap mi ka sungral thluh” a ti.

Heidi Yeh cun a zuk midang hmangsawng tertu JWT company cu tayacui a tum nan company lam cun “copyright neitu kan si ih kan duhdan in kan hmang thei” an ti ih a mah Heidi Yeh sawn cu company hminsiatter thubuai thawn tayacuai an tum lawk.

Tuahcun, Heidi Yeh cu photo model khawvel le hlanlai thubuai hmuahhmuah tan san in a semsuahnak Nantou County khua ah a tlung kir ih social media hmang in local ceiawknak a thehlar ṭheu a si.

Leave a Reply

Your email address will not be published. Required fields are marked *