Trump Plaza Hotel and Casino inn hlunpi An Ṭhiat Bal

Atlantic : New Jersey khawpi ih inn ropi pakhat a rak si dah mi Trump Plaza Hotel and Casino inn hlunpi cu February 17 ah dynamite fung 3,000 thawn puah cim in an ṭhiatbal thluh.

US President hlun Donald Trump in 1984 kum ih a ong mi Hotel le Casino innpi a si ih sumsaw lam remcanglonak ruangah a neitu sinak botcat in kum 2009 ah a rak tansan mi innpi a si.

Trump Plaza Hotel and Casino innpi cu lehpannak lam ih mi hminthang, rockstar le Hollywood lemcan khawvel ih hminthang pawl rak tlanlen ringringnak a si ih Casino manager hlun Bernie Dillon cun “Madonna, Sean Penn, Hulk Hogan siseh, hlasakthiam Mick Jagger tepawl rak tlanlennak hmunpi a si”.

“Mike Tyson boxing thongnak khalah voitamzet kan rak hmang dah. Boxing thong ropi deuh a um a si le Muhammad Ali, Oprah tipawl khal an ra zoh ṭheu ih boxing thongnak ring kiang ihsin Pu Trump le thawn an zoh tlang ṭheu. A cuangce mi innpi a si nan, tuah, hivekin ṭhiatṭul dinhmun a si cu ka ui zet a si” a ti.

Innpi dinhmun a sia deuh ruangah kum 2014 in khawtlang mipi luh an kham ih 2016 ah Trump Plaza Hotel and Casino innpi cu Billionaire invertor Carl C. Icahn in a lei tiah NBC news in a tarlang.

2021, Jan 29 ih ṭhiatbal an tummi asinan remcanlonak ruangah an bal khuasuak lo ih February 17 zinglam ah khawngaw le cangsualnak um lo ten an ṭhiatbal suak a si.

Innpi hmunhma cu June 10 hlan ah thianfai thluh an tum ih innsak nakding project thar a um hlan sung cu parking lot ah an hmangtum tiah NBC news in a tarlang.

Leave a Reply

Your email address will not be published. Required fields are marked *