Salvador Ramos thu ah Facebook le US cozah thu an el aw

2022, May 24 zinglam nazi 11:30 hrawng ah Uvalde, Texas ih Robb Hramthok Tlawng cu Salvador Ramos, kum 18, in meithal thawn a luhcilh ih tlawngta nauhak 19 le cazirhtu 2 a kap that. Amah khal Tlawnginn sungah an kap that ve.

Tlawnginnsung a lut hlan minute 30 hrawng duh ah ralrin peknak Facebook cahmai ah a tarlang ti`n Texas Gov. Greg Abbott in press conference ah a rel.

Texas Gov. Greg Abbott cun “tui` thu ka rel ding baak lo cu sual a tuah dingmi thu ah ralrin pekawknak ziang hman a um lo” ti`n Facebook mawhthlukdeuh vekin thu a sim.

“Hmaisabik a ca post cu ka pi ka kap ding a ti. Voihnihnak ah ka pi ka kap a ti. Voithumnak cu Tlawnginn a thlen hlan minute 15 duh hrawngah si ding, Tlawnginn ka kap ding ti`n Facebook ah ca a post” ti`n Governor Greg Abbott cun press conference ah a rel.

Cutiih thu a rel ruangah internet cahmai pawl ah Facebook ṭongsantu le mawhthluktu hmuh ding an tam ih, nauhak thisen cu Facebook kut ah a um titiangin soiselawknak a um. Nan, Facebook spokesperson Andy Stone cun cutin a si lo ti`n thuhla a rel fiang ve.

“Khuatlang mipi hmuh dingih ca post mi a si lo. Private messages kuat awknak thawn khat le khat biakawknak a si ih kapawknak a suak hnu lawngah kan hmusuak mi a si. Thuhla zirzoitu thawn hmalaknak kan nei tlang rero” tiah a ti.

Hivek buainak thawn a pehpartu social media account cu palik lam in an pholang lo hman ah online researchers pawl in an phorhsuak ṭheu nan Salvador Ramos FB account cu atu ca kan ngan tiangah phorhsuah a si hrih lo.

Salvador Ramos ca ngan mi pawl ah ziangvek thuhla pawl a ngan tel timi cu Facebook spokesperson Andy Stone in a rel tel lo.

Asinan, Ramos instagram account le private message a kuat mi pawl cu an phorh suak zo ih, mi thawn an beaw nakah a thil tuah dingmi thlithlam cu a rak rel cia a si.

Leave a Reply

Your email address will not be published. Required fields are marked *