Tipi sung ih Covid 19 Sii hlon mi cun Ngate tamzet A That

INDIA : Kan dung zarh sung, Jammu & Kashmir ih nga tamzet an thi ciamco mi cu Covid 19 sii tipi sung ih an hlon ruangah a si timi an hmusuak.

Kan dung zarh sungah Bhaderwah khua kiang ih Neeru tipi ah nga thi pawl an phuanaw ciamco ih kiangkap um khawmi pawl an mangbang zet.

An thih nak san a um ko ding timi zumnak thawn tipi kiangkap ih zingzoinak an nei lai ah tipi sung le tikap ih Covid 19 sii tamzet tantami mi an hmusuak.

Hih thuthawn pehpar in Bhaderwah ih Deputy Commissioner Rakesh Kumar cun “hih thuhla hi kan ngai poimawh zet ih Sii a hlon tu theisuak dingin zingzoitu team khat kan thlah zo. Zingzoinak kan nei ih Sii hlon tu kan thei tikah nazet in daantatnak kan nei ding” a ti.

Kiangkap pawl cun Siizung lam an mawhpuh nan Siizung lam in an mah an si lo thu le ni cem zo mi Sii pawl hman dongdah zet ih hlon men lo in senior officer hmai rori ah an siatter ṭheu thu an rel.

Neeru tipi cu Bhadarwah ramṭhen hrang ih thupi zet mi tipi a si. Hih tipi ring in nganthliar ih pumcawmawk an tam hlei ah ngate zuat pawl ih tidai lak nak hmun a si.

“Sii pawl cu tipar ah an phuan aw hlei ah tipikap khal ah tamzet kan hmu. Sii pawl cu covid 19 mina tuamhlawmnak ih hmang ṭheu mi hydroxychloroquine, azithromycin, betamethasone, paracetamol, zinc tablets pawl an si ih 2022 kum ih ni cem ding hlir an si.”

“Ziangruangah an hlon timi cu kan thei lo. Delivery hnaṭuan pawl in Covid 19 mina umnak Siizung feh ṭih ah an thil va pek dingmi cu tipi sungah an hlon hlo tla a si thei men” tiah Khuasung um Neeraj Singh Manhas in a sim. (TOI,NDTV)

Leave a Reply

Your email address will not be published. Required fields are marked *