TikTok star Faphir te, Kum 4 Thawng Tlak Thei Dinhmun Ah Um

TikTok, Youtube, Instagram ih lar zet Alan le Alex Stokes (kum 23) faphir te cu 2019 October thla ih Bank rob prank an tuah mi ruangah kum 4 sung thawngtlak thei dinhmun an si thu, California cozah in a phuang.

Faphir te cu Social media ah hminthang sin dingin capoh video tuah ṭheutu an siih Bank rob capoh an tuah mi cun minung nunnak tiang a cem ter thei a si ti`n California cozah in thubuai a tuah sakih an mawhnak hmuhsuah a si le kum 4 fingfing, thawng tlak thei dinhmun an si.

Alan Stokes le Alex Stokes

Prank video ahcun hmel langlo dingih hnipuan dum hruh, mi pahnih cu Innpi ihsin bag dum khai phah in an tlansuak ih motor kham phah in tlanhlotum vek deuh in a lang. Uber motor an kham nan motor mawngtu in a phur duh lo.

Cutiih an buai lai cu kiangkap mipi pawl in motor hijack tum ah an ruat ih 911 an call. Palik an ra thleng ih buainak um taktak ah an ruat ruangah Uber mawngtu cu meithal thawn tin in an kham.

Cuhnu ah lemcangnak (Prank) men a si ti an theisaal ruangah Uber mawngtu an thlah saal ih Faphir te cu ralrinnak pek in an tlungter. Nan, Faphir te cun zianghman in ti lo pam ti`n nazi 4 rei hnu ah cuvek ciah in Bank rob prank an tuah lala.

Cutivek dinhmun a si ruangah California, Orange County District Attorney Todd Spitzer cun “Law enforcement officers cu mipi kilhim dingih thukamawtu an si. Mi pakhat khat in bank rob thuhla in 911 a ko a si le officer pawl ih hnaṭuan dingcu mipi him dan dingih cangvaih a siih a ṭul ahcun meithal khal an hmang ding.”

“Asinan tui` dinhmun cu Internet ih hminthan duhnak men ih tuah mi a siih mipi le officer pawl ih nunnak tiang phan sak ding khawp ih cangvaihnak a suak ter a si. Curuangah khuasung laifang ih Bank rob Prank tuahtu Faphir cun Daan an pahbal a si” ti`n a sim ih “thubuai tuah sak mi ah an mawhnak hmuhsuak asile kum 4 thawngtlak thei an si” a ti.

Tulai, tleirawl pawl lakah Internet ih Lar duh ruangah mah nunnak hrang tiang ṭihnung ding khawp ih cangvaihnak neitu an tam zet ih, 2018 khalah Youtube ih thlah dingmi Prank tuah ah an cangsual. Cuih ṭum ah Monalisa Perez in a tlangvalpa a kapthat ngahpang ruangah thawng a tlak a si.

Leave a Reply

Your email address will not be published. Required fields are marked *