Thianghlim Lilawn ah Taklawng ih Zuk Aw Tu France ram nu an kai

India : Dehradun District, Rishikesh khua, Thianghlim “Lakshman Jhula” lilawn par ih taklawng in zukaw ruangah France ram mi numi pakhat cu Rishikesh palik in an kai.

Lakshman Jhula lilawn cu Ganges tipi tlun ih don mi a siih India mipi hrang ih thupi zet mi Thianghlim kezawh lilawn a si.

Rishikesh khua ih palik hotu R.K. Saklani cun, “Ramdang mi hrang ahcun himi Lilawn cu zianghman lo men a si men thei. Asinan, Rishikesh cu Hindu biaknak hrang ih thianghlim hmunpi a si.”

“Lakshman Jhula cu Hindu pathian Ram, a nupi Sita le anau Lakshman pawl ih Ganges tipi an tan nak hmun a si. Curuangah hih hmun cu Hindu biaknak hrangih hmun thupizet pakhat a si” a ti.

Cuvekih, hmun thianghlim ih ruahmi a si ruangah taklawng ih zukawtu France ram mi Marie-Helene (kum 27) an kai nak a siih a mawh nak an hmusuak sile kum 3 sung thawngtlak thei dinhmun a si.

“Amah cun ṭhi, faute le kutkhih dangdang, online ih zuar mi ka siih cumi thehlar duh ah ka zukaw mi a si a ti” tiah R.K. Saklani cun a sim ih “a umnak Hotel khalah taklawng in a zukaw” a ti.

Tu ah, Marie-Helene cu paisa thawn an bail suak sung ih a thuhla umdan zoh ciang in zingzoinak an nei peh rero a si.

Lakshman Jhula lilawn cu Hindu pawl ih hmun thupi pakhat a si tlunah, 1960 kum hrawng ah hlasakthiam The Beatles group in Yoga tuahnak/zirnak hmun ah an hmang ruangah a hmin a thang sinsin ih Leitlun huap tourists pawl ih vehvai duh zet nak hmunpi pakhat a si.

ref:reddit,CNN

Leave a Reply

Your email address will not be published. Required fields are marked *