Thaisun, UK ram ih Covid 19 vaccine dawt pawl cun Himi caphek fate an dong ding

UK ram ah thaisun December 8 ihsin thok, Covid 19 vaccine an dawt thawk thlang ding ih Sii dawt pawl ih dong dingmi hminsinnak caphek fate khal an suah zo.

Miṭhen cun caphek cu Covid 19 vaccine dawt a si zo timi hminsinnak vaccine passport vekih hman theih ding vek in an sim nan ca par ih an ngan mivek a si ahcun voihnihnak vaccine dawt bet dingmi hngilhlonak hrang ih an pek tum sawn mi si in a lang.

Caphek par ahcun “Covid 19 vaccine dawtding hngilh hlah aw… voihnihnak siidawt hngilhlo dingin na zaal lole paisabawm ah paitel aw. Voihnih na dawt cun na him zet ding” tiah an ngan a si.

UK ram ih tlangzarhnak an nei dingmi Covid 19 vaccine cu voihnih dawt ih dawt dingmi a siih tukum December sungah doses million 4 hrawng tlangzarhnak an nei tum a si.

UK ram ih Covid 19 vaccine tlangzarhnak an nei tum mi cu kan dung zarh ah Secretary of State for Health and Social Care Matt Hancock in tlangthannak a nei.

Amah cun “Hmaisabik doses 800,000 cu hmaizarh ihsin hmanthokthei a si thlang ding. Hmaisabik ah kum upa enkolcawp ṭul care home ih um pawl le a kilkhawitu staff pawl hrang ah tawlrel a si ding ih a sangtu ah kum 80 luan kum upa le health care staff pawl hrang ah tawlrel a si ding” tiah kan dung zarh ah a rak phuang a si ih “mizaran cu NHS lam in Sii remcang hnu ah dawt dingin pehtlaihnak a nei leh ding” a ti.

Thaisun ihsin UK ram ah Covid 19 vaccine hman thok a si ding nan mipi lam cun ralring fimkhurten tlanlen a ṭul hrih ding tiah England Chief Medical Officer, Professor Chris Whitty in Vice media hnen ah a sim a si.

Tu dinhmun ah UK ram ah Covid 19 mina 1.74 million an um zo ih, cumi ah minung 61,434 an thi a si.

Leave a Reply

Your email address will not be published. Required fields are marked *

error: hahahahahaha !!