Taiwan ram ah 6.2 magnitude Thacak Ling a Hnin +Video

December 10, local zaan nazi 9 hrawng ah Taiwan ram ah 6.2 magnitude thacak Linghninnak a suak tiah US Geological Survey in thuthang an suah ih inn tamzet a sawi nasa nan siatralnak report a um hrih lo.

“Yilan khuapi nisuaknak lam, peng 45 thuk in a hnin thok ih Taipei lam khal a tlir ban. Kan umnak inn khal nasaten a hnin ih ka fapa thawn innleng ah kan tlan lohli” tiah Central Weather Bureau Seismological Center ih ṭuanvonei Chen Kua-chang in tualsung media hnen ah a sim ih “30-40 seconds hrawng a hnin peh. Taiwan ram hmun tamzet a tlir ban” a ti.

Amah cun, “tubai ah ruahpi ceen thawn Leimin ralrin a ṭul zet. Cozah lam khal in hmuntinkim ngaihven in hmalaknak an nei” a ti.

The Independent meida hrang ih hnaṭuan Taiwan ih um William Yang in “Yilan nisuahnak lam km 26 hrawng in a hnin ih kan umnak inn khal nasazetin a hnin. Taiwan ram hmuntamzet ahcun 4 magnitude thacak hrawng in a hnin tiah thuthang kan dong. Taiwan thawn km 735 hrawng hlatnak Japan ram tiang a va hnin ban.” a ti.

Taiwan ram cu Pacific Ring of Fire tiih koh mi Leikak kiang ih ummi rampi a si ruangah tu le tu Ling a hnin ṭheu ih December 10 hnin mi cu tukum sung ih Thacakbik a si tiah The Independent media in a ngan.

Leave a Reply

Your email address will not be published. Required fields are marked *