Surgery hrang paisa ṭul tuk mi cu Phuangaw duhlo Millionaire in bomnak a pek

South Yorkshire, Doncaster ih um kum 4 nute Emily Anderson cu a taksa ṭhanglian theilo, thahri com/cat in a um ringring ruangah a nu le pa in kum 2017 ah a taksa pum in check ciang dingin siizung an pan pi.

Ataksa pum scan nak an nei hnu ah a keh lam thluak ciangkuanglo mi an hmusuak. Thla kim lo in a piang ruangah a thluak lam a ciang kuang lo mi a siih feh thei lo le tong thei lo in a um men thei tiah doctor pawl in an sim.

A thluak ciangkuang lo mi cun a ke thahri pawl a pehzom theilo ruangah ṭha ten a ding thei lo ih ṭhiṭha khal in a to theilo.

A nu le pa cun an fanute cu duh tawk ih to, ding, feh thei danding an tawlrel ih cangvai thei ko surgery tuah theihnak an hmusuak.

£75,000 cemliam ih Surgery tuah nak ding cu online ah fund an hawl ih nazi 24 sungah hmin rel duh lo mipakhat cun ka lo bawm hai ding ti`n a tiam hai.

Surgery tuah nak ih cemliam hmuahhmuah a kuan tum hlei ah a dam tikih Disneyland feh nak ding tiang a tawlrel sak thluh.

Naute nu Paula cun “Online ih fund kan hawl thok nazi 24 sungah zo a si timi simaw duhlotu mipakhat in, in phone ih surgery tuah nak ding hmuahhmuah cu ka lo kuan sak thluh ding in ti. Ka lungawi tuk taak ah ṭong lohli ding khal ka thei lo. Ka mitthli a dok”

“Surgery tuah nak ding le Siizung ihsin a suak hnu ih tuamhlawmnakding tiang ka tum ṭheh ding a ti hlei ah nauhak vancungram a si mi Disneyland feh nak hrang tiang ka tum ding a ti” tiah a sim.

Emily Anderson ih sunmang cu a rualpi pawl lak ah mipangai bang ih tlawng kai thei ding hi a siih December ih Surgery tuah ding mi an hlawhtling a si le a sunmang cu a cangsuak taktak ding a si. (Mercury Press)

Leave a Reply

Your email address will not be published. Required fields are marked *