Suak theilo dingin Covid 19 nat neitu` Inn an phit sak, Mipi LungAwiLo

China cozah in Covid 19 suakpekte ih Wuhan, appartment innpi pakhat a rak seal sak dah vekin, India, Bengaluru ih appartment innchaung 2 cu coronavirus Kaaitu an um ruangah local cozah Bruhat Bengaluru Mahanagara Palike (BBMP) in nathrik kaaitu umnak inn chaung 2 cu zohman suak theilo dingin rangva thawn a phit sak.

Appartment inn chaung hlangtu` hnen um pakhat in coronavirus a kaai ruangah hivek in hmalaaknak an nei mi a siih, inn an seal lai zuk cu an inn hnen pa in online ah a thlah.

Internet ih a thlah mi zuk ah cun, “ka innhnen te covid 19 nathrik an kaai ruangah BBMP cozah in an inn a phit sak thluh. Pu tar umnak le nauhak 2 nei umnak inn a siih kaangmei suak pang sehla teh ziangtin an tuah ding? An hrang ah ṭih a nungtuk rori. Curuangah hih thuhla cu ṭuanvo neitu pawl in ngaihsak zang uh” tiin ca a ngan tel ih, thuthang a suak veten venghnen kiangkap mipi pawl cu an lung a awilo ih local cozah BBMP cu an mawh thluk.

Inn hnen pa ih zuk a thlah mi cu nazikaar reilo te ah mitamzet in an share sawng vivo ih BBMP cozah ṭuanvo neitu pawl khal in an rak hmu.

BBMP lam khalin thuthang an hmu veten thiamthu relnak le a ṭuldaan vekih hmalaknak an nei tum thu an phuang lohli ih, ṭuanvonei pakhat cun,”Covid 19 nathrik lak ihsin khawtlang mipi himnakding hrang ah kan tuah mi a si. Asinan, kan cangvaidaan a luarkai deuh ti kan hmusuak. Curuangah inn an seal nak raangva pawl cu kan phong lohli saalding” tiin mipi hnen ah simtheinak an nei lohli.

Asinan, mipi lam cun BBMP cangvaidaan cu an luarkai tuk rori ti`n an aupi thotho ruangah BBMP official Manoj Kumar Meena cun “hih thubuai thawn pehpar in inn a seal saktu le contractor pawl khal kan theiter thluh zo ih a ṭuldaan vekin hmalaknak kan nei tum a si” a ti.

ref:TOI

Leave a Reply

Your email address will not be published. Required fields are marked *