Social media ih Zuk na thlah peih tuk mi hin Hivek dinhmun ah a lo thlen thei

Online ah neihsiah lang ter ruangih inn boh, thilfir, rob tuar a ni ni in an tam vivo ih cu pawl lak ah England ram mi Kieran Hamilton khal a tel ve.

Zaan khat cu a umnak Manchester inn ih a it lai ah thawmvang a thei ih a ṭhang dukdi. Sualawk hmang ui tum pahnih a zuat mi an sual aw lala ah a ruat ih zoh dingin a ding ciah ah karbak ih kai so awnthawm a thei. Amah cun ui an sual aw ih a khum nak bawm sung in a suak mi thawmvang si ding ah a ruat.

“Kez” tiih koh mi, kum 21 mi Kieran Hamilton cun thawmvang suak nak lam a va pan cu naamtong sau keng mipahnih a tong dukdi. Cute pahnih cun “na paisa, na kolmi riittheihsii le na nazi in pek lohli aw” ti`n an hringhro ciamco.

“Instagram ah ka neihsiah lang ter in ka post aw ṭheu ruangah naam dawt ka tuar” tiah Kez cun a hmuhton mi cu TheVerge hnen ah a sim ih “ka inn cu hremaw ciamco hnu ih mithatnak hmun a bang phah thluh” a ti.

Amah hi suakthawn Tlawng kai lai ih Tlawng suahsan a si ih council estate sung ih inn luah a si. Phone dawr ah hna a ṭuan ih paisa laklut dan Youtube ihsin a zir phah rero. Cutin paisa laklut danding boruak hai a thiam thok ih paisa khawl mi khal a nei thei phahphah.

Amah cun thlakhat ah £50,000 laklut thei in a rel aw ih invesment tuah dan khal a thiam ruangah paisa laklutnak a nei tam sinsin.

Cutin motor, nazi mankhung, hnipuan ṭha tivek a lei thok thei ih milian vek ih a khawsa mi cu Instagram le Twitter ah a thlah ringring. Paisa tam zet cemliam ih Holiday a feh lai tivek khal live in a thlah ṭheu.

Thilmankhung hlir thawn nuam zet ih a khawsa mi cun a umnak veng hnen le a rual pi pawl a ti mangbang thluh. Tikcucaan reilo te sung ah ziangtin paisa hizetzet a nei thei ti`n mino pawl in an rel celcel ih thilthup pakhatkhat tuah mi a nei si ding titiang in zumnak an nei.

Kez cun “Mizaran hnak ih niam innsungsang ihsin ṭhanglianmi ka si ruangah mi ṭhen khat cun reittheih thawn pehpar aw mi tuahthup nei lo seh la hivek in a neinung lo ding ti`n an ruat. Cutin ka thuhla cu a thang vivo ih an mah le an zumnak cio relsuak in zuk ka post mi ah comment an ngan ṭheu” a ti.

Kez zumnak ahcun mipahnih rori ih rob a tuar mi cu a thuhla online ih an zum nak an ngan celcel mi ruangah siding a zum. “Curuangah siding. In rob tu pahnih cun ‘na safe (paisa le thilmankhung tivek retṭhatnak bawm him) ong aw’ in ti, riitheihsii hawl in ka itphah khal an let thluh. Atak ahcun safe khal ka nei lo ih riitheihsii khal ka zuar lo” ti`n Kez cun a sim ih “cutin, online ihsin thuthang diklo thei tu mipahnih cun in rob” a ti.

Kum 2018, zirzoinak ih hmuhsuahmi vek a si le UK ram ih inn boh tuar mipum 12 lak ih mipakhat cu online ih neihsiah langter ruangih buainak tong an si, ti a si.

Zirzoinak dang pakhat an tuah mi khal ah tulai inn boh hmang zaṭek 78 cun social media hi inn an boh ding mi duhhrilnak ah an hmang ih online tracking method hmang in inn an boh ti a si.

US ram ih inn boh hmang group pakhat khal in art mankhung kol pawl cu social media hmang in an track ih an mah duhzawng le caanṭha bat in olsamten thilmankhung an fir ṭheu. Huston ih cozah hnaṭuan mipakhat khal Andy Warhol hmang in a inn ih live art gala a tuah hnu ah a neih mi thilmankhung pawl cu olsamten an fir sak a si.

Football lek thiam John Terry cun a follower mipum 3.4 million hnen ah a sung le pawl thawn holiday an feh thu le a sungte pawl thawn cuvek caan ṭha hmang tlang thei mi asunglawi zia a fan pawl hnen ih a sim ruangah an um lo caan bat in misual pawl cun inn an boh sak ih £400,000 man thilmankhung an fir sak.

Kim Kardashian khal 2016 kum ah a instagram thawn an track ih Holiday a feh nak Paris khuasung sunlaipadir rori ah palik hnipuan hruh mipanga in meithal thawn an rob ih a neih mi thilri an long thluh hnu ah ek-inn sungah an kharhkhum ta. Cuih ṭum ih a hmuhtonmi ruangah Instagram ih zuk a thlah dan khal a thleng phah thluh.

Kez khal cu, culai ah milian ciamco a si lo nan neinung zet vek in social media ah a theh laraw ciamco ruangah a nunnak tiang a sung phah zik a si.

Cuih zaan, mipahnih in an rob zaan ah Kez cu a ban ah naamte thawn an at ih a laptop, phone, paisa le a uico Rambo an fir sak a si.

Leave a Reply

Your email address will not be published. Required fields are marked *